Situacion laboral na Banco Central lo ta intolerable

ORANJESTAD – E situacion laboral na Banco Central di Aruba lo ta yegando un punto di culminacion cu e trahadonan no ta dispuesto pa tolera mas. Esaki ta e informacion cu a yega na NoticiaCla.com, cu a compronde cu e situacion no ta di awo, sino cu ta andando pa basta aña caba y cu ta empeorando solamente mas y mas. “E ta yegando na un grado intolerabel” ta e gritonan cu ta saliendo di un grupo grandi di trahado disgusta .

Loke ta molestia e trahadonan ta cu nan no tin representacion di un sindicato ni otro grupo cu nan por desahoga nan frustracion laboral na e instituto financiero. Nan ta sinti cu nan no tin e proteccion laboral cu nan merece y cu nan cana ta yenando. Ademas, segun e informacion cu NoticiaCla.com a ricibi, “e clima no ta saludabel, y nan no tin ni pariba, ni pabou pa scapa e loke nan ta yama ‘tirania’.

Hopi mas informacion NoticiaCla.com no por a haya, ya cu e cultura di miedo cu tin den e instituto ta asina grandi, cu e trahadonan tin miedo cu nan por perde nan trabou si nan basha abou. Pero loke si NoticiaCla.com a compronde, ta cu e situacion ta uno caotico y cu nan no ta dispuesto pa wanta mucho mas. NoticiaCla.com a haci intento di comunica cu e presidente di CBA, pero e persona no tabata alcansabel y yamadanan haci, no a wordo debolbe te cu diabierna atardi.