Razzia den KIA a produci 6 celular entre 25 preso

ORANJESTAD – Un total di 6 celular a wordo haya diabierna mainta durante un razzia na KIA. E hecho cu no a haya droga of arma, pa e presidente di e management team, Fred Wijenberg, ta basta bon caba. Mientras cu e ta indica cu tin un problema cu a haya relativamente hopi celular (6) entre un grupo di 25 preso, ta hopi bon compara cu otro prisonnan otro caminda na mundo. Y cu no a haya arma, sigur ta un alivio pa Wijenberg. Arma semper ta motibo mas serio di preocupacion.

E razzia di diabierna tabata basa riba un sospecho cu e presidente mes tabatin, cu a conduci na e razzia di sorpresa. E razzia mes a dura 3 ora y a keda haci pa tanto e ekipo di IBT’rs y esun di K9 , cu a listra tur e celnan en busca di cosnan ‘illegal’. Y rapidamente despues cu a saca tur e presonan for di nan cel, y a cuminsa busca, a dal riba e telefonnan aki. NoticiaCla.com a compronde cu varios di e presonan a protesta riba e razzia, y tabatin te hasta algun cu a yama afo pa alarma di e situacion.

Pa loke ta esnan cu a wordo haya cu e celularnan, lo haya un medida disciplinario contra nan. Si nan haya te 3 medida den un periodo, e ta pone cu e chens ta grandi cu nan por perde e derecho di VI. Esaki ta e posibilidad pa haya libertad mas prome cu tempo y hopi biaha ta traduci den 1/3 parti di reduccion di e castigo. No ta conoci si esnan cu a wordo haya cu e celular, di cuanto biaha esaki ta, ni kico lo pasa cu nan aworaki.

NoticiaCla.com a raporta e razzia diabierna mainta tempran, unda cu den prome instante a raporta solamente cu a haya varios contrabanda. Kico exactamente esaki tabata ensera, no tabata conoci e momento ey, pero a confirma na NOticiaCla.com cu e razzia tabata uno exitoso, y cu e la produci varios material cu e personal di KIA a logra confisca. Esey a resulta pues den 6 telefon celular.