A duna e curpa di victima di asesinato na de Vuyst liber pa entiero

ORANJESTAD – A entrega e curpa di e dama hoben asesina na de Vuyst diabierna ultimo, pa entiero na e famia. Fuera di esey, e investigacionnan ta continuando pa determina kico exactamente a sosode, cu a conduci na e morto cruel di e dama Sarahi Sierra. Diadomingo a informa e famia cu ta laga e curpa liber y cu por cuminsa haci e tramitenan pa entiero. Esaki mas sigur ta tuma luga den fin di e siman cu ta bin.

INVESTIGACION

Pa loke ta e investigacion, autoridad tin wowo riba algun persona y a combersa y detene algun persona inicialmente pa interogacion. No ta conoci cuanto persona a keda deteni, ni si tin mas detencion na caminda. Pero a compronde cu no ta descarta cu den e proximo rato- of dianan, lo por pone man riba algun persona mas pa interogacion y posibel encarcelacion relaciona cu e caso.

PREGUNTA

For di informacion cu e portal aki por a acumula, e caso ta mustra di ta uno hopi compleho. Por ehempel, a compronde cu a manda busca un patologo di afo pa haci e autopsia, ya cu e ta mas conoci cu tipo di e casonan manera esaki, pasobra ta considera e caso aki uno hopi diferente cu normal. E forma con a haya e dama den su cas, y den e estado cu a hay’e, a laga hopi mas pregunta cu contesta. Cuanto hende tabata envolvi, con largo e persona(nan) aki a haya pa haci loke nan a haci y si tin testigo cu por a mira y/of tende algo. Esaki ta importante mirando e situacion y localidad di e casnan. E casnan ta banda di otro, unda cu un bisiña por practicamente mira y scucha den cura di otro, no lagando mucho privacidad pa otro. Pues si tabatin desordo of algo for di normal, cu esaki e hendenan eybanda mester por a capta. Tur esaki tin atencion di e autoridadnan cu henter fin di siman a sigui cu e investigacion riba e caso.