Formacion di gobierno di coalicion canando pocopoco, pero sigur

ORANJESTAD – Si tur cos cana manera mester, posibelmente Aruba ta conoce su prome gobierno di coalicion cu un dama na cabes como Prome Minister. Mientras cu tin un silencio ‘hermetico’ riba e tema, toch e informacionnan ta circulando inoficialmente tocante reparticion di cartera. NoticiaCla a compronde cu cos ta basta avansa y cu e nombernan cu a entrega pa screening, ta pasando esaki tambe. No tin fecha ainda pa completa e proceso, pero no ta dura mucho mas y ta premira pa fin di e siman aki of comienso di otro siman cu e proceso por ta cla pa huramenta gabinete Wever I.

E NOMBERNAN

Tin un lista di nomber cu ta circula riba reparticion di e carteranan, aunke ningun partido of instancia kier confirma cu e lista aki ta esun final. No obstante esey, e lista ta sali di e fuentenan cu ta(bata) envolvi cu e negociacionnan y cu tabata presente durante esaki. Manera cu e lista ta poni, esnan cu ta poni pa bira minister pa partido MEP, obvio ta; Evelyn Wever cu ‘Algemene Zaken’, Dangui Oduber Turismo y Deporte, Xiomara Ruiz cu Finanza, Glenbert Croes cu Salud y Utilidad, Chris Romero cu Enseñanza, Andin Bikker cu Husticia y Integracion, Otmar Oduber cu Medio Ambiente y Infrastructura, y Rudy Lampe cu Asuntonan Social. Falta algun cartera manera Labor, Telecomunicacion y e otronan ainda no a logra sali afo di dje. Pero ta un lista cu ta circulando cu e portal aki no por a confirma oficialmente, pero cu a sali di e seno di hende cu ta negociando