Rafini: Tin mucho mas miho alternativa pa paga enbes di checks

ORANJESTAD – Mientras cu Aruba ainda ta uzando checkbook pa cumpli cu nan pagonan financiero, e paisnan na Europa p.e. tin mas di 15 pa 20 aña cu nan no ta uza checkbook mas. Asina vice presidente di asociacion di bankero na Aruba, Pierre Rafini, ta bisa den e programa NoticiaCla LIVE riba e tema. Segun Rafini, localmente e cifra di usuario di checkbooks ta minimo. A conta cu apenas 10 cliente pa banco (total 50 cliente) cu porta ta hacienda uzo di un checkbook ainda. Pues e uzo personal ta minimo. Comercialmente si ainda e uzo ta hopi.

MOTIVACION

Segun Rafini, e echo cu otro pais ta operando sin checkbook pa mas di 10 pa 20 aña caba, ta un motivacion pa nos na Aruba. “Si nan por a survive tur e tempo ey (sin checkbook), nos tambe lo por”, Rafini a sigui bisa. Pa esnan cu ta uza exclusivamente e forma di pago pa medio di un check, tin suficiente alternativa existente caba cu nan por ‘adapta’ na dje segun Rafini. “Nos a inverti hopi den tecnologia den e banconan aki na Aruba” e vice presidente bancario ta bisa. Mester pensa e.o. riba mobile banking, debit cards, atm machine cu tin hopi mas posibilidad cu un check.

RIESGO

Motibo pa no uza checks mas ta hopi. Entre nan, e ta algo cu bo tin cu skirbi na man, ta tuma hopi tempo, tin su riesgonan, manera; falsificacion, resulta sin fondo y mas. Y finalmente, e ta dura mas tempo pa placa por pasa.

INTRODUCCION

A duna e cliente ‘priva’ menos tempo pa adapta na e cambio, pasobra ta mas facil pa e cliente adapta na un otro metodo. Como tal e cliente tin te luna di mei otro aña (2018) pa adapta, mientras cu pa comercio, nan ta haya un aña completo pa efectua e cambio aki.