Otro siman ta soluciona problema di rijbewijs na Aruba

ORANJESTAD – E problema di escases di rijbewijs na Aruba lo keda soluciona otro siman. Por lo menos den un forma temporal. Minister di husticia Arthur Dowers a confirma na NoticiaClac.com cu e fin di siman aki ta finalisa e testnan necesario riba e tipo di carnet temporal cu usuarionan nobo di rijbewijs lo por bay uza (pa periodo di tres luna) te ora cu e rijbewijs definivo oficial keda cla. Esey ta nifica cu esnan cu a slaag pero cu no tin e documento ainda, tin cu warda un par di dia mas, prome cu nan por subi caminda y demostra cu nan tin e abilidad di core responsabel riba caminda.

Pa algun tempo caba, tin un grupo di persona (e cantidad no tabata conoci pa minister) cu a keda perhudica pa motibo cu mientras cu nan a slaag pa nan rijbewijs, polis no a keda cla pa traha y otorga esaki ainda. Minister Dowers a admiti cu un problem administrativo a pone, cu cos a pega cu un grupo ta na cas sin por core auto ‘cu rijbewijs’. Pero e motibo no ta pasobra no tin placa of cu presupuesto no ta firma. Segun e mandatario, un fayo na directie financien a pone cu cierto documento di pago no por a wordo procesa, y consecuentemente no por a paga e compania e placa necesario y asina haya e hardware y software pa por traha y procesa e rijbewijs.

E rijbewijs actual ta wordo traha na Hulanda. Cu tur e consecuencia cu esaki por trece cune manera tardamento di proceso, papel ta caba etc. A dicidi pa traha e rijbewijs na Aruba mes, pa asina tin miho control y maneho di e rijbewijs. A informa e compania na Hulanda na tempo cu no ta renova e contract cu nan na juni ultimo, pa cual mester a cuminsa prepara pa Aruba mes cuminsa procesa su rijbewijs. E mandatario a sigura cu tur esey ta tras di lomba. E loke ta e hardware y software ta cumpra y ta propiedad di pais Aruba y cla pa bin Aruba unabes cu esaki ta cla, lo cuminsa proceso rijbewijs localmente.

E parti di carnet temporal tin un proceso di seguridad hopi bon hinca den otro, cordina cu Centrale Post di polis, cu ta pone cu ora cu un hende wordo ‘gara’ cu e carnet, esaki lo mester ta registra na Centrale Post. “Si un hende ta pensa cu tin algo temporal ta bin cu nan por pensa di bai falsifica esaki, nan por saca esaki for di nan cabes pa nan no haya nan mes sera sin tin mester” Dowers a sigura NoticiaCla.com. Unabes e pruebanan ta termina, lo cuminsa otorga e carnet temporario for di otro siman, riba un fecha y lugar ainda no stipula. Esaki pues lo keda anuncia na tempo pa otro siman esnan cu a keda perhudica, por busca nan carnet temporal, valido pa tres luna.