A confisca curpa di victima di asesinato y e cas na de Vuyst

DE VUYST – Awe mainta tempran autoridad tabata na de Vuyst atrobe pa continua cu e investigacion di e caso di asesinato di e dama Sahari Sierra (19) na de Vuyst di ayera merdia . Ministerio publico ayera tardi laat a confisca e curpa y e cas, pendiente mas investigacion. E ta un proceso normal, den caso di un morto, cu no ta cla kico e causa ta. Unabez cu e causa ta determina, of cu ta conoci cu e causa di morto no ta uno criminal, ta laga e curpa den libertad. No ta conoci cuanto tempo e proceso aki lo dura.

SITUACION

Ayera tardi mientrastanto e situacion rond di e area di e suceso a bira tenso, ora cu esnan presente a mira un pickup double cabina pasa pazuid di e cas. Ey un grupo di persona a acerca e vehiculo y a cuminsa altera contra esun den e vehiculo. Mesora polis presente a nota cu no por a maneha e situacion nan so y a pidi pa refuerso. Den un rato di ora un cantidad di polis a yega, pa pone orden y a bay cu e persona den e vehiculo. A compronde cu autoridad tambe a confisca e vehiculo. No ta conoci si ta persona di ‘interes’ di polis, of si a hib'e pa otro motibo. Despues a bin trankilidad atrobe na e sitio. Anochi pa algo pasa di 7’or, a hiba e restonan mortal for di e sitio y riba orden di ministerio publico, a confisca e curpa pa investigacion. 

E CASO

E caso mes ta uno di hopi misterio, ya cu no por a compronde e motibo di e morto y mas ainda e forma cu a haya e dama den dje. Completamente sunu, na sanger y cu un saco mara cu waya. E tabata un bista horibel, segun esnan cu a mira esaki. E famianan mes ta ainda den shock y sigur e ruman muher chikito, cu a bin haya su ruman grandi den e situacion penoso ey. Pa loke ta e caso, a compronde cu e mainta ey, ainda el a hiba su yiu creche y lo mester tabata na cas. Den curso di dia e mama di Sahari tabata preocupa cu e no tabata haya contacto cu ne y eynan e cosnan a cuminsa cana. Dado momento e ruman chikito a yega cas y haya su ruman grandi den e situacion horibel riba e di dos piso di e cas.

Anochi e famia a bay un otro caminda pa pasa anochi, ya cu ta obvio cu na e cas ey, nan no por ta mas. Vocero di polis, Lito Lacle, ayera durante dia a splica cu tin un team di experto ta analisando e caso y tin como tarea pa descubri e forma con e dama a perde su bida exactamente, ken a hacie y loke ta mas importante, pakico esaki a sosode. Tur ta pregunta cu e famianan ta kibrando cabez cu ne, memey di nan tristesa y dolor inmenso. Tanto e mama como e pareha, fuera di e resto di famia tabata inconsolabel y no por caba di compronde ken(nan) por a haci un acto asina horibel y con nan bida lo continua sin nan ser keri, cu a keda ranca for di nan, di un dia pa otro.

SARAHI

Sarahi Sierra tabata un dama hoben (19), cu un criatura di 3 aña, cu e tabata adora. Mientras cu el a cuminsa scol bek recientemente, e tabata hopi activo den deporte, particularmente e deporte di volleyball y no mas cu awe mester a inicia un torneo di volleyball. Pero mirando e suceso, a dicidi di cancela e weganan di e torneo di e fin di siman aki. Notabel tabata e avalanche di mensahe di convivencia di parti di su amigonan personal y di e mundo di deporte, cu no por a kere loke a sosode cu nan amiga stima.