Personal di Aduana a gara pasahero di barco crcucero cu droga

ORANJESTAD - Personal di Aduana a gara pasahero di barco crucero cu droga. Mientras cu e acto a tuma lugar algun dia pasa, ta diabierna e departamento a raporta esaki publicamente pa prensa. Segun e relato, tabata algun dia pasa riba un mainta durante un control rutinario riba e pasaheronan, cu a yega abordo di e barconan crucero Monarch, Adventure of the Seas y Nieuw Amsterdam, prome cu e main exit gate 3, un oficial di aduana a nota un pareha ta haci straño, ora nan a mira e cacho di droga.

CONTROL

E oficial duanero a mira e pareha a bira bek bay direccion di un bari di sushi y e pasahero masculino a saca algo di e saco di su carson y tira esaki den e bari. Despues e pareha a cana direccion bek pa e exit gate 3. Durante control riba e pareha, e cacho di droga a duna un melding positivo.

Dos oficial di Aduana a wanta e pareha, mientras un otro duanero cu e cacho di droga a bay controla den e bari sushi y a haya un sakito cu yerbe, parecido di marihuana y un sakito cu puiro blanco parecido di cocaina.

INVESTIGACION

A hiba e pareha na oficina di Douane Recherche pa mas investigacion. Durante control den un tas di man di e dama a haya un pipa, cu ta uza pa huma marihuana. E pareha a nenga cu nan a tira algo den e bari di sushi y cu nan no ta uza droga. Nan a bisa cu nan ta abordo di e barco Adventure of the Seas y e oficialnan di Departamento di Aduana a pidi e pareha permiso pa controla den nan camber y nan a bay di acuerdo.

ADMISION

Canando cu e pareha pa bay den e barco, e pasahero masculino a admiti cu el a tira e droga den e bari y den su camber tin un cantidad chikito di droga. Cu permiso di e Chief Security Officer, a controla e camber di e pareha cu e cacho anti droga. E cacho anti droga a duna un melding riba un cashi. Den e cashi a haya un kluis y den e kluis a haya 2 sakito cu yerba parecido di marihuana y un sakito cu puiro blanco parecido di cocaina. A test e puiro blanco y e yerba, cu a sali positivo pa cocaina y marihuana.

MULTA

Despues di a confisca e droga, Departamento di Aduana a tuma contacto cu fiscal y fiscal a duna e pareha aki un multa di USD 150,00. E pareha a paga e multa y a  entrega nan bek na Chief Security Officer. E Chief Security Officer a baha e pareha for di e barco na Aruba.