Parlamento a pasa mocion di desconfiansa contra minister Paul Croes

ORANJESTAD – Parlamento a pasa un mocion di desconfiansa contra minister demisionario Paul Croes, terminando asina nan confiansa den dje. Esey kiermen cu awor Croes no por ta minister mas y e proceso ta cuminsa pa para e persona den su funcion. Lider di partido MEP, Evelyn Wever Croes, den un prome reaccion na NoticiaCla diaranson atardi, a mustra cu esaki mester ta un señal na e parlamento nobo, cu no ta tolera e forma con e parlamento anterior a atende e asunto en particular aki. Na mes momento a sigura cu e accion aki no ta uno contra Paul Croes personalmente, sino contra e funcion y e respet cu e funcion merece.

AWOR

E pregunta pakico a dicidi di actua awor, durante e prome reunion den e constelacion nobo, tambe Wever a reacciona riba dje. Specialmente si mira cu e reaccion di e.o. fraccion di AVP, cu a critica e accion, indicando cu si a warda algun dia mas, Croes toch no ta minister mas y cu ta considera esaki mas bien un ‘powerplay’ y un acto di persecucion. Wever a sigura e portal aki, cu esey ningun momento ta e caso. “E no ta un persecucion, e no tabata un ‘leedvermaak’ tampoco. Si nos haci esaki despues, ta mustra cu nos no ta para pa integridad. Manera cu nos a priminti, nos lo bay actua y cu mas bien nos no ta tolera esaki. Nos mester a actua awor… awe,” Wever a sigui bisa. “Mi no por haci e cambio aki un luna. Loke nos a haci ta coregi e erornan di e parlamento anterior,” Wever a sigui bisa.

MOCION

E mocion tabata prepara delanta caba segun Wever, aunke a warda te final pa presenta esaki. Motibo tabata cu nan kier a wak con e reunion ta bay y mas importante, con e parlamentarionan nobo di AVP lo a actua den esaki. Pero segun Wever, lamentablemente nan a keda desapunta den e parlamentarionan nobo, sigur Robert Candelaria, cu mas bien a defende e actuacion di Paul Croes y bisa cu Croes a haci loke el a haci y cu ta persecucion esaki ta y cu mester mas bien ‘embrace’ e persona. Esey no a cay den bon tera y na final di e reunion, e fraccion di MEP, sosteni pa POR y RED, a vota 12-9 pro e mocion di desconfiansa contra Paul Croes.