Aruba vigilando derame di petroleo di Venezuela pa cualkier eventualidad

ORANJESTAD - Aruba ta vigilando e derame di petroleo di Venezuela di e siman aki pa cualkier eventualidad. Bureau Rampenbestrijding Aruba a ricibi e informacion cu riba dialuna y diamars ultimo pa motibo di awacero pisa, cu a registra na Peninsula di Paraguana Venezuela na Amuay, a conduci na un derame di petroleo cual lo ta uno significante. Ta papia di alrededor 200.000 bari di producto, incluyendo e combinacion di gasolin y diesel.

Departamento Meteorologico Aruba a haci uzo e tecnologia cu nan ta dispone di dje, pa asina haci un simulacion, caminda a crea un modelo di e coriente di lama pa logra haya un bista di e trayectorio cu e derame aki por tuma. Tambe via e modelo aki nan por a wak si Aruba lo por ta afecta pa dicho derame. 

Mirando e distancia entre Aruba y Venezuela ta pone cu Aruba ta keda vigila e situacion aki di cerca, pa asina ta prepara den caso di cualkier eventualidad.

Bureau Rampenbestrijding Aruba a haci su contactonan oficial cu RAC/REMPEITC-Caribe kende ta e instancia oficial, unda Aruba ta afilia pa locual ta e asuntonan regardando derame di petroleo en general. Te cu awe 12 di merdia no tin ningun registracion oficial for di Venezuela na RAC/REMPEITC-Caribe tocante un derame cu lo por a sosode na Venezuela.

Bureau Rampenbestrijding Aruba kier a informa pa medio di e boletin aki, cu a haya informacion tocante un derame na Venezuela, cual no ta  registra oficialmente pa e canalnan oficial. Asina cu ricibi mas informacion tocante e derame aki lo nos suministra esaki na prensa, pa asina prensa su turno, informa e comunidad di Aruba tocante esaki. E potretnan ta di e derame na Amuay.