Coalicion den Parlamento na St Maarten ta rebeldia contra Marlin

PHILIPSBURG – Gobierno di St Maarten a bay di acuerdo cu Hulanda pa acepta e ayudo financiero, door di acepta e condicionan stipula pa Hulanda. Esaki a keda participa dialuna durante un conferencia di prensa di prome minister William Marlin. Su gobierno a bay di acuerdo pa cambia e ley di camber di integridad door di nombra un miembro di Hulanda den e camber, banda di 2 di St Maarten. Ademas ta laga marechausee yuda cuida e frontera di e isla. Di otro banda, den parlamento a surgi un rebuelto ora cu un grupo di e coalicion actual a uni di cierto forma cu e por bira un posibel coalicion nobo. Varios di nan a firma un acuerdo ayera, considerando un cambio di signatura di gobierno. Cierto medio na Corsou a te hasta bay asina leu di bisa cu gobierno di St Maarten a cay. E problema a cuminsa diabierna ora cu presidente di parlamento y miembro di coalicion Sarah Wescot Williams a protesta e actuacion di premier Marlin, y menasa di retira sosten na e gabinete. Pa esey ela haya sosten di otro partido y su miembro Chanel Brownbill (USp). E situacion actual ta poco confuso na e isla, aunke cu ta papia di un crisis evita.