Bapor Hulandes Zeeland ta intercepta y para transporte di droga

WILLEMSTAD – Marina Hulandes a intercepta y para un transporte di droga den lama Caribe recientemente. Cu uzo di e.o. e dash 8, e avion maritime di Kustwacht Caribisch Gebied (KWCARIB), a detecta un go fast sospechoso noord oost di Bonaire. E bapor Hulandes Zeeland, cu tabata na caminda bek pa Hulanda despues di su trabou den Caribe, a cambia su curso y yega pa asisti. A sigui un persecucion cu helicopter di Zeeland, unda cu te hasta disparo a cay pa obliga esnan riba e gofast pa para. E momentonan ey esnan abordo di e gofast a tira tur loke nan tabatin den lama. E helicopter a tira e motornan di e gofast, destruyendo esaki pa forza e gofast pa para. Na final, a haya 12 bulto balora na 600 kilo di cocaine, cu a wordo tira di e gofast, den lama. A detene e tripulantenan di e gofast. Zeeland a transporta e detenidonan y e droga confisca bek pa Corsou, y despues a sigui su curso pa Hulanda.