ATIA preocupa cu proceso di “leggerwaarde” na DIMP

ORANJESTAD - Pa algun luna caba ATIA ta vigila e proceso di ricibi “leggerwaarde” for di Departamento di impuesto (DIMP) pa cu transaccionnan di propiedad, benta di cas, extension di tereno etc etc. Miembronan di ATIA y comercio, pero tambe individuonan cu ta desea di inverti den un cas ta keha con largo procesonan di transaccion ta dura na notarionan pa motibo di e balor cu DIMP tin cu establece. E proceso aki, aunke cu e por wordo mira como un proceso relativamente simpel, ta haci un efecto grandi ariba transaccionnan financiero, y consecuentemente ariba nos economia.

TRANSACCION

Personanan cu ta desea di haci un transaccion pa medio di notario tin biaha ta warda lunas pa e balor di e propiedad wordo determina door di e departamento aki, y como consecuencia un actividad economic, cu hopi biaha ta crea trabow den nos sector di construccion, ta tranca.

BANCONAN 

Pa e mesun motibo aki, nos banconan ta hanja nan den un situacion cu nan ta cla pa financia un cliente un cas, compra di un tereno, construccion di edificio nobo etc, pero e transaccion no por tuma luga pa motibo di un departamento cu no ta cumpliendo pa establece e balor cu gobierno ta duna na e propiedad. E propio gobierno ta perde di ricibi su parti di e transaccion nan aki. Nos economia mester pa inversion tuma luga efficiente, y no por accepta un situacion causa pa un departamento, cu pa lunas caba no ta funcionando manera mester ta. ATIA ta spera cu e departamento di DIMP y e minister encarga na e momento aki, presta atencion na esaki pa asina reestablece un servicio cu ta di sumo importancia pa comercio, inversion, trabou, entrada di gobierno, empleo y pueblo en general.

VIGILA

ATIA ta keda vigila e proceso aki, pero ta spera cu e servicio aki wordo treci bek na un nivel normal, y asina reestablece cu nos sector financiero, construccion, y tur otro transaccion cu ta depende ariba e servicio aki, por ser agilisa na beneficio di comercio, nos economia y tur su efectonan cu inversion eficiente tin pa henter nos pais.