Bin conoce ‘@7 House of Dolls’ na Love Festival 2017

ORANJESTAD – Un di e stagenan nobo cu sigur bo tin cu check it out durante e Love Festival di e aña aki ta e ‘@7 House of Dolls’. Pa prome biaha den Love Festival, den un festival na Aruba y den Caribe, bo ta haya un stage cu ta ‘LGBTQ Friendly’. Y no por ta otro tampoco paso si nos ta papia di amor, esey ta nifica e ora ey tambe un sinti di respet pa tur hende. Orguyosamente organisadornan ta yama e comunidad LGBTQ bon bini den Love Festival 2017, deseando pa nos tur hunto disfruta di un fin di siman yen di gozo y aceptacion.

E ‘@7House of Dolls’ ta un stage produci y presenta pa @7 Club cu recientemente a habri su portanan riba nos isla. Den e mesun estilo, tur anochi lo tin varios presentacion teatrico cu toke extravagante. E fin di siman di 3, 4 y 5 di november proximo tur hende cu ta desea, tin chens di wak e shownan unico aki den cada presentacion di DJ. Asina ademas di bon musica, ta ofrece algo fabuloso pa wak tambe.

Riba e prome anochi, esta diabierna 3 di november, e tema lo ta ‘@7: Pirates of the Caribbean’ caminda DJ Edan lo ta un di e DJnan tocando. Pa diasabra e @7 House of Dolls ta presenta ‘@7: The Colors of Passion’ como su tema pa e anochi hunto cu e musica di DJ Joa. Pa cera e Love Festival 2017, e @7 House of Dolls ta hibabo den un mundo magico di ‘@7: Fairy Tales’. E DJ di e anochi lo ta Ricardo B.

Entusiasmo y expectativa ta grandi pa tur loke e House of Dolls Stage tin prepara pa publico den su debut den Love Festival 2017. Fuera di e stage aki, tambe lo ta den Love Festival pa prome biaha e Caribbean Stage presentando ritmonan di reggae, bailabel, soca y tambe rock. Hunto cu e stagenan Techno, Love y Underground, ta forma e Music Boulevard cu bo no por keda sin disfruta di dje. Pa mas informacion di tur esaki, ademas di e We Love Food Trucks Festival y Encanto, bishita lovefestivalaruba.com of riba media social.