Personal di ambulance a tene walk out

ORANJESTAD – E personal di ambulance dienst a tene un walk out di un ora diabierna mainta tempran, pa mustra nan malcontento cu nan condicion di trabou. E motibo primordial den cual nan tin cu haci nan trabou. Presidente di sindicato ABV Gina Maduro a mustra cu e situacion ta uno di varios aña y falta di actuacion di esnan responsabel a pone cu e personal a dicidi di pone trabou abou, en espera di reaccion di e.o. minister di salud. A duna e mandatario 2 siman pa bin cu un solucion pa e problema, of por lo menos presenta un plan di ‘aanpak’ pa drecha e situacion.

Segun Maduro, pa lunanan largo a purba tene e trahadonan paden pero awor a bay di acuerdo pa saca nan ‘pafo’ y protesta. “Cada biaha tin casonan cu ta pasa tras di otro, cu a pone cu awor a bira dimas” Maduro a bisa NoticiaCla.com. “E problema principal ta cu nan ta traha bou di un situacion insigur, y e pashentnan ta den un posicion tambe ‘onveilig’ “ Maduro a sigui bisa. Y unabes cu e situacion ta asina, ta un bon señal pa mustra cu e situacion no por sigui, segun Maduro.

E trahadonan por ta bon entrena, pero ta e ekipo cu nan tin cu traha cune manera e autonan no ta den un estado apto pa opera. For di e 10 ambulancenan cu tin, 2 so ta funciona optimalmente mientras tur e otronan ta den garashi practicamente tur di, segun Maduro. Un raportahe cu a wordo haci recientemente pa television, a enfoca riba e ambulancenan mas nobo, creando un impresion cu tur otronan tambe ta bon. Algo cu segun Maduro, no ta e caso.

Entre e problemanan cu e autonan tin, ta e airconan cu no ta traha y portanan cu no ta habri di paden. E trahadonan ta sera den cabina patras, y tin bentana cu no ta habri, y shocks di auto cu ta bati. “Ora cu un ambulance mester core ‘cu spoed’, e no por pa e evita cu pashent no keda afecto den e ambulance. Tabatin un incidente cu a pasa siman pasa cu tabata e drupel cu a pone cos pasa over. No kier a bisa kico e ta, pa motibo cu e ta algo delicado. Edificio tambe segun Maduro, ta ‘afgekeurd’, y e espacio pa e personal ta mucho chikito. Un edificio cu apenas 2 camber disponibel di cual uno ta pa e OVM (Officier van Dienst) y e otro pa 13 pa 14 persona cu tin cu traha hunto. Un carta for di seno di e servicio a bay pa tanto ministernan presidente y esun di salud. Eyden lo para e critica y tambe ta exigi un plan van aanpak cu ta inclui un schedule pa haya sa con lihe e situacion por wordo remedia.