Tur docente a haya felicitacion di minister Hooyboer

Awor cu vakantie grandi a cuminsa y tur scol a cera porta, Minister Michelle Hooyboer-Winklaar ta manda un palabra di gratitud na tur docente pa nan esfuerso y bon trabou realisa durante e aña escolar cu a pasa. Un palabra di gratitud special ta bay na tur e docentenan cu ta baha cu pensioen e aña aki.

  "Boso a dedica boso bida na educa nos yiunan, hasta tin docente cu a educa yiunan di nos yiunan!  Maestro- y maestranan a yuda mayornan hopi biaha  na un manera constante y cu hopi dedicacion, na duna nos yiunan e halanan pa nan bula riba nan propio forsa y scoge nan propio rumbo. Boso por mira bek riba un profesion di responsabilidad grandi, un profesion noble y respeta. Lastima cu no tur ora  e aprecio pa e profesion aki ta wordo demostra suficientemente", asina Minister Michelle Hooyboer-Winklaar a duna di conoce.

E Minister ta trahando riba e asina yama "teacher care" y ta di spera cu lo mira e frutonan di esaki den futuro cercano.

Na tur hubilario cu a cumpli 25, 30, 35 aña di servicio ta bay un palabra di felicitacion di parti di Minister Hooyboer. Na december lo celebra e logro glorioso aki hunto cu e coleganan cu a baha cu pensioen e aña

"Danki na tur cabesante, docente y tambe comision di mayor pa un aña di trabou duro, pero di  balor inmenso. Gosa di un vakantie bon mereci", asina e mandatario a termina bisando.