Studiantenan EPB San Nicolas y Hato a bishita Amsterdam Manor Beach Resort

ORANJESTAD -  Riba e dianan 25 y 27 di october di 2017 The Amsterdam Manor Beach Resort a ricibi un biaha mas e studiantenan di EPB Hato y San Nicolas, pa asina haya un rond leiding y orientacion tocante e diferente departamento den e propiedad.

E bishita aki a bira un evento cu ta altamente anticipa pa e studiantenan y ta un iniciativa cu ta tumando lugar anualmente durante dos aña caba y unda cu e obhetivo principal ta pa laga e studiantenan aprecia e industria turistico; e diferente ramonan di studio cu ta contribui na e operacion di un hotel, y asina stimula nan interes pa nan tambe por forma parti di e crecemento di Turismo di Aruba.

Riba diaranson 25 di october tabata e turno pa 20 studiante di EPB San Nicolas huntu cu nan mentornan y diabierna 27 di october tabata e turno pa 25 studiante di EPB Hato y respectivo nan mentor. E tour a ser duna na Papiamento y nan a cubri e structura general di e maneho di e propiedad, entre e topiconan cu a ser toca tabata structura individual di cada departamento, Dress Code pa e industria, e aspecto di ta 'service-minded', disciplina na pia di trabou, e posibilidadnan pa crece y por supuesto, pa disfruta di nan labor. Esaki ta duna e studiantenan e oportunidad di por wak di cerca con un hotel ta opera y nan por haya un mihor bista di e industria, pa asina eventualmente ora cu nan mester tuma decisionan di ki rumbo nan kier bay den bida, nan por haci esaki cu un base solido y bon informa di kico e industria di turismo ta ofrecenan.

The Amsterdam Manor Beach Resort ta un hotel cu ta contribui constantemente cu e sector di educacion di Aruba y ta kere fielmente cu ora nos inverti den educacion, nos no mester enfoca unicamente riba recursonan economico, sino tambe den e recursonan social (capital humano).