Van Dam: ‘Berdad cu cada denuncia mester wordo atendi seriamente’

ORANJESTAD – “Cada denuncia mester wordo atendi seriamente” Asina Procurador General di Aruba Alexander van Dam a bisa recientemente den e programa di NoticiaCla LIVE. Durante e programa riba facebook di e portal aki, e magistrado ta sigura cu si tin e impresion y imagen di ministerio publico cu no ta tende nada mas di un denuncia, e ora mester cambia e imagen ey’. Segun e PG, tur victima cu haci denuncia tin e derecho riba un tratamento corecto.

DENUNCIA

“Tur denuncia ta wordo atendi, y si tin denunciante cu no ta haya un contesta riba su denuncia, esey no ta corecto”. Asina Procurador General Alexander van Dam a bisa recientemente den e programa NoticiaCla LIVE. “Mi ta di acuerdo cu bo cu si un hende haci un denuncia y no ta tende nada mas di nos, esey no ta corecto. Esey no ta corecto pa e confiansa di e ciudadano den ministerio publico y tampoco pa e confiansa di e ciudadano den e estado di derecho di e isla.”

PRUEBA

E denuncia haci, mester tin indicacion cu prueba, sino un denuncia no tin sentido. “Prome cu nos inicia cu un investigacion a base di un denuncia, mester tin algo substancial cu ta sostene e denuncia”.

DENUNCIA

Segun van Dam, e ta ricibi varios denuncia na OM, y tin biaha te hasta ora cu e ta for di oficina, den p.e. supermercado. Problema ta cu ora cu e bisa e denunciante potencial pa haci e denuncia na e lugar corecto, hopi biaha esey no ta sosode.

PROCESO

Un di e criticanan cu tin ta cu ta kere cu denuncianan no ta wordo tuma sea na serio, of no ta wordo atendi, y mas pio, no ta tende nada mas bek di dje. Van Dam ta duna como ehempel e caso di dos siman pasa ora cu riba un diabierna a tene un accion y a gara cantidad di hende y droga. Esey tabata posiblemente un accion basa riba un tip cu a ricibi di ciudadano. Pero e ciudadano ey mester compronde si cu ora cu e duna e tip ey, no ta mesora su amanese ta haci un inval riba e caso. “Mester tuma e lugar bou di observacion prome, cu polis, camera etc etc. E ta tuma tempo, pasobra por tin cosnan cu no ta manera nan mester ta” van Dam a bisa.