Wever: ‘Un poco mas avansa cu e programa di gobernacion’

ORANJESTAD – Aruba tin su parlamento nobo, pero nada ainda di un gobierno. Durante e ultimo update di parti di formador Evelyn Wever Croes diabierna na prensa, ta conoci awor cu ta avansando, y cu te hasta a cuminsa cu e tema di reparticion di cartera, den un forma informal. Pero no tin fecha ainda pa keda cla cu e formacion, y Wever a bisa cu e no ta bay pone fecha mas pa esaki keda cla. “Nos ta un poco mas avansa cu e programa di gobernacion” Wever a bisa pa loke ta e parti ey.

CARTERA

A determina e ministerionan mas importante y menos grandi. Basa riba esey, kier refleha e resultado di eleccion di 9-9-2-1. Como ehempel a bisa p.e. cu si RED haya un ministerio principal, POR ta haya 2 y a resta 7 of 8 ministerio principal, nan ta bay pa MEP pa e ta husto, segun Wever. Pa por complace tur hende a base di e resultado di eleccion, mester tin por lo menos 12 minister. Algo cu no lo sosode, pero ta purba want'e na 7. Si nan hinca awa den biña, esey ta nifica cu lo tin 8 minister, pero reparti den mas ministerio, esta cu ministernan ta haya mas ministerio. “Mester cluster nan mas na otro e ora” Wever a bisa.

PARTIJRAAD

Wever a bisa cu ainda no a logra convence su partijraad pa e reparticion di minister bira 4-2-1, pasobra ainda no a bay partijraad mes cu e tema aki ainda, pasobra e no a yega asina leu ainda. E hecho cu ta papia cu esnan cu a haya nan posicion den minister manera Guilfred Besaril y Andin Bikker como presidente y vice president respectivamente no kiermen cu esey ta nifica cu nan no por bira minister of haya otro funcion.