PDVSA a logra paga su debe diabierna di 842 miyon dollar

CARACAS – Tur atencion di institutonan financiero internacional diabierna tabata riba Venezuela y PDVSA pa wak si e ta logra cumpli cu su pago, of keda den debe cu consecuencia serio pa e pais. Pero den curso di dia, e compania estatal petrolero a bisa cu a logra transferi e fondonan di 842 miyon riba bonnonan, surpasando asina e prome di hopi barera cu e pais ta confrontando e proximo dianan. Entre nan, tin un pago mas di 1.1 biyon dollar cu mester wordo paga pa dia 2 di november proximo.

ALIVIO

E anuncio a presenta un sentido di alivio pa inversionistanan den e mercado di bono, cu a aumenta e prijs di propiedad Venezolano ariba. E intencion segun informacion ricibi, ta cu PDVSA tin intencion di cumpli cu e pago biyonario otro siman tambe. Un fayo di pago lo tabata desastroso pa PDVSA na un momento unda cu aceso na credito pa e pais ta hopi dificil. Refinerianan ta na mitar di nan capacidad y ta sacando menos di 2 miyon bari di petrolio pa dia. Presidente Venezolano Nicolas Maduro a sigura cu su gobierno lo sigui cumpli cu e obligacionnan internacional.