Venezuela awe por ta den incumplimento di pago di 842 miyon na debe di PDVSA

CARACAS – Tin chens cu Venezuela por ta den ‘default’ awe, esta incumplimento di su debenan, mescos cu ta e caso weekend pasa. Fin di siman pasa Venezuela no a cumpli cu un pago di 237 miyon den pago di coupon di bonos, culpando fayo tecnico pa e incumplimento. Expertonan financiero sinembargo ta bisa cu Venezuela simplemente no tin placa pa paga. Hunto cu e suma di 349 miyon dollar den interes di bono no paga, e ta acumula na 586 miyon cu e pais no a paga. Awe, Venezuela (PDVSA) mester paga 842 miyon. Contrario na e otro sumanan cu tin period di gracia pa cumpli, esun di awe no tin esey y riba dje tin cu paga 1.1 biyon riba 2 di November (otro siman), tambe sin periodo di gracia. Den pasado recien, net prome cu e fecha vence, Venezuela a ricibi un prestamo di 1 biyon dollar di Rusia, un siman prome. E biaha aki no ta conoci si esey lo sosode atrobe. Venezuela a logra den pasado di converti nan cumplimento, basa riba e tempo di gracia. Pues structuralmente nan ta duna nan mes 30 dia extra cada bez un debe su fecha vence. Pa nan, esey ta ‘paga na tempo’, pues segun e fecha di vencemento di gracia, y no e fecha original. Venezuela a faya 5 biaha cu pagamento di debe, y tur tabatin un periodo di gracia.