Parlamento awe a despidi di algun di su miembronan

ORANJESTAD – Parlamento a despidi di parlamentarionan cu no ta bolbe den e ‘Parlamento nobo’ diabierna. Awemainta e ultimo reunion di e parlamento den su constelacion actual a tuma lugar. Esaki tabata e di 9 Parlamento desde cu Aruba a drenta su Status Aparte na 1986. A dispidi di e parlamentarionan cu no lo bolbe den e di 10 parlamento di pais Aruba. Mayoria ta esnan cu ta pertenece na e fraccion di AVP.   Hopi tabata e palabranan di elogio y e bon deseonan na e parlamentarionan cu awe a despidi di e organo mas halto di pais Aruba.

WEVER

Lider di oposishon sra. Evelyn Wever Croes a repasa e ultimo 8 añanan cu no tabata esnan di mas facil pero awe por wak bek riba un experiencia increibel. Sr. Andin Bikker a repasa tur e cambionan di leynan y mocionnan cu su persona a bin cu ne durante e ultimno 8 añanan.

Sr. Rene Herde di AVP mescos cu varios otro parlamentario a ilustra cu ta un parlamentario no ta facil mirando tur e oranan cu bo ta reuni den sala di parlamento en bes di por pas'e cu bo famia. El a gradici su famia pa e pasenshi, y a comenta cu awor cu e ta bay cu pensioen e tin tur tempo di mundo pa bay cushina y pasa tempo cu su nietonan.

THIJSEN

E unico miembro di parlamento pa fraccion di MEP cu no lo bolbe den e constelacion nobo di parlamento ta Juan (Ady ) Thijsen. Varios tabata e coleganan di dje cu a gradicie pa e 12 aña cu e la dedica den parlamento, y a recorda varios anectdota di sr Thijsen cu na varios biaha a pone henter e sala di parlamento na harimento.

Varios di e parlamentarionan nobo cu lo presta huramentacion mañan diabierna tambe tabata presente den tribuna di parlamento pa asina presencia e clausura di e Parlamento 9 y haya un idea con un parlamento ta funciona. Tur e oradornan di awemainta a felicita tur e candidato parlamentarionan nobo, y a desea nan tur clase di exito den e funcion nobo y importante cu nan lo eherce desde mayan diabierna.