Caso di fraude na Arubus no ta afecta e cashflow di e compania

ORANJESTAD – E situacion di fraude na Arubus, no ta perhudica e situacion financiero di e compania. Esaki a keda confirma diahuebs pa minister di Transporte Otmar Oduber na NoticiaCla.com. Mes momento e ta desbarata e ponencia cu no a entrega keho na Aruba sino a bay entrega keho prome na China. Y tambe mientras cu e placa ta ‘bek’ pa Arubus, e investigacion den Arubus mes ta sigui pa haya sa kico realmente a pasa y kico ta bay sali afo.

Pa loke ta e ‘falta di keho entrega na Aruba’, e mandatario di transporte a refuta esaki. “Absolutamente no ta berdad. E prome keho haci, ta 24 ora despues cu a constata un transaccion cu a tuma lugar sin autorisacion di Arubus. E keho ey a wordo entrega na Aruba na cuerpo policial” Oduber ta sigura NoticiaCla.com. Pues no ta asina cu a bay China prome cu e keho, y cu nunca no a entrega keho na Aruba.

Na su turno, polis di Aruba a notifica interpol, y nan ta conduciendo e keho cu a wordo entrega, hunto cu e banco envolvi, Oduber a sigui splica. E solo motibo, segun Oduber, cu ta e director mes mester a biaha, ta debi na leynan existente na Hong Kong, y tabatin un deadline mara na dje di 27 di september pa ta presente en persona eynan. Mester a bay dilanti tanto notario, como un hues pa por los e fondonan atrobe y pone nan bek unda cu nan mester ta. “Sino e fondonan ta pasa pa estado y gobierno chines lo tuma e placa ey” Oduber a sigui bisa. E investigacion, mirando cu no ta trata di ambtenaar of departamento di gobierno unda cu lo mester a entrega e keho na ministerio publico, esaki a sosode na polis mes. “Nan mes na nan turno lo pasa esaki na ministerio publico, y nan lo determina kico ta haci cu e caso aki” Oduber a sigui bisa.