Expertonan Hulandes contento con e mangrovenan na Spaans Lagoen ta creciendo

ORANJESTAD - Expertonan Hulandes di Wageningen ta contento con e mangrovenan na Spaans Lagoen ta creciendo. Departamento di obras publica DOW a bisa den un comunicado cu 17 october ultimo un team di Wageningen Environment Research tabata na Aruba pa asina inspecciona e mangrovenan.

Dr. Lawrence Jones Walters kende, hefe di e programa di biodiversidad di Wageningen, a declara cu e ta sumamente contento con e progreso ta bayendo y cu solamente falta algun detayenan chikito pa completa e proceso. Alabes e la comenta cu na ambos banda di e brug di Spaans Lagoen e mangrove ta creciendo fuerte y cu e pasada di awa pa lama a keda garantisa durante ehecucion di e trabou. Segun Wageningen DOW y Odinsa a haci un tremendo trabou pa minimalisa e daño ora cu e brug a wordo construi.

“E iniciativa pa planta e mangrovenan ta importante pa e isla di Aruba pa motibo cu e ta pertenece na naturalesa di e isla y cu ya caba e area di compensacion den Franse Pas ta wordo uza pa parha y pisca. Tambe tin un crecemento natural di mangrovenan preto cu ya a cuminsa crece alrededor di e pasada di awa nobo. Nos ta contento tambe con Parke Nacional Arikok su Park Rangers a cuminsa planta mangrovenan cora,” asina Dr. Lawrence Jones di Wageningen a conclui durante su bishita di inspeccion acompaña pa director di DOW Sr. Marlon Croes.

Ariba e potret por mira nos Director di DOW hunto cu e team di experto di Wageningen Environment Research.