Van Dam: Un minister di husticia no por mete cu e trabou di PG

ORANJESTAD – Un minister di husticia no por mete cu e trabou di un Procurador General. Asina e magistrado mr Alexander Van Dam a bisa den e programa NoticiaCla LIVE riba facebook. Berdad cu e mandatario ta su hefe, pero no por ‘mete’ den e trabou di e magistrado, door di bis'e con pa traha. Loke si e por haci ta delibera riba ki tereno por bin cambio y unda por enfoca mas cu otro. E pregunta ta bin na raiz di cambio di gobierno unda cu ta spera pais Aruba un minister di husticia nobo, unabes cu e formacion di gobierno termina. Tambe pasobra na comienso di e periodo di trabou di van Dam, tabata cuestiona PG'nan den pasado cu lo por tabata wordo influencia pa e mandatarionan den pasado. Van Dam a sigura cu durante su experiencia di 1 aña y mei na Aruba, e no a experencia esey cu e mandatario demisionario di husticia. 

MINISTER

Van Dam a splica cu un minister di husticia ta forma parti di un gobierno y e tin cierto plannan cu pais Aruba, manera cu tur gobierno tin. “Ami tin plan cu OM (ministerio publico), den un vision strategico cu ta e.o. combati traficacion illegal di arma, droga, labamento di placa etc etc. Pero tambe integridad di gobierno ta hopi importante” van Dam a bisa. A splica mas aleu cu un minister di husticia tin su propio agenda, unda cu e kier p.e. duna mas atencion na prevencion. Algo cu mi ta bay sostene sigur.

METEMENTO

“Pero mi ta magistrado tambe como PG, cu ta nifica cu mi no ta un organo ehecutivo manera impuesto of douane of polis. Mi tin un obligacion di magistrado, cu ta nifica cu mi tin cu traha pa Dama Husticia. Si mi ta haya cu nos tin cu trata un tipo di caso, y e ora mi ta haci esey for di e angulo. Y si e minister bisami cu e no kier pa mi trata e caso ey, pasobra e ta perhudicami politicamente, e ora nos lo tin un problema grandi” van Dam a sigui bisa. E magistrado mes momento ta bisa si cu e ta kere si cu den un eventual situacion asina, cu nan lo sali for di dje, pasobra e ora e (PG) por splic'e e pakico politica no por mete cu su (PG) trabou. Esey ta un sistematica cu nos ta wak na Hulanda tambe.

POLITICA

Riba caso coriente, e PG a bisa cu obviamente no ta haci declaracion, y politica no ta bay determina p’e cua caso e por of no por traha riba dje. “Politica por bisa si cu e ta haya cu OM mester traha mas riba p.e. accidente di trafico, y si por trata esey mas hopi. E ta algo logico cu por papia di e prioridad entre PG y minister pasobra e minister a presenta esaki tambe den su programa di compaña” van Dam a bisa. Awor cu tin un minister di husticia nobo, e ta warda kico ta e plannan cu e persona ta bin cu ne. No obstante esey, a tende caba via programanan di partido, cu tin atencion pa e.o. prevencion, control di frontera. Y tur, segun e PG, ta cosnan cu e por traha cu ne y tambe ta interesa pa traha ariba cu e minister nobo, ken cu esaki bira.