FTA a denuncia situacion laboral cu trahadonan di Hyatt Regency Aruba

ORANJESTAD - Directiva di FTA diaranson a denuncia publicamente sucedidonan cu ta tumando lugar cu trahadornan di Hyatt Regency cu a dicidi di bira miembro di FTA. Segun e president di sindicato FTA Rudy Dirksz, esaki ta un actitud contra sindicato y derecho di tur trahador. “Manera cu nos a compronde di nos miembronan na Hyatt cu tin gerentenan cu ta yama trahador un pa un pa mas cu un biaha den oficina pa presiona nan pa motibo cu nan a bira miembro di sindicato. Esaki ta lamentabel y FTA lo denuncia esaki internacionalmente” Dirksz a sigui bisa. Segun e sindicalista, apesar di un ley cu ta bisa cu trahadornan no por wordo stroba pa bira miembro di sindicato toch gerencia di Hyatt no ta respeta e ley aki. Hefenan lamentablemente no ta cooperando cu e trahadornan cu asunto di trabou y expresa directamente contra nan. Tambe ta ofrece trahadornan placa y posicion pa nan sali foi sindicato. E trahadornan cu ta miembro di sindicato ta wordo descrimina pa Management completo cu ta bisa e trahador pa e busca sindicato pa e ser yuda. Ta ofrece algun trahador posicion pa nan no vota pa sindicato! Gerencia cu ta reuni den restaurant awor ta exigi pa solicita pa nan wordo sirbi solamente pa waiternan cu no ta miembro di sindicato. Esaki ta un falta di respet total pa derecho di trahador y sindicato.

Ta ofrece retiro a cambio di bon pago na esnan cu kier retiro. Derecho adkiri di e trahador no ta wordo respeta. Awor gerencia no kier cumpli cu custumbernan pa laga e trahador come of break despues di 3 ora trahando. GM personalmente a laga e trahadornan di bar sa cu nan lo no bay vota dia 26 october pasobra e ta bay cumpra nan un manera of otro y ta buscando e cabesante pa dun'e un oferta!!!

Segun Dirksz, manager mes a informa cu si nan combati e sindicato nan lo logra haya un otro pay check pa e logro! Tambe lo tin informacion cu tur manager ta tratando pa intimida e trahadornan y maltratando e trahadornan cu ta haci uzo di nan derecho pa bira miembro di sindicato. “ Pakico Hyatt Aruba no kier sindicato; pa sigui abusa y kita e trahadornan nan derechonan? Esaki ta un berguensa!!”e lider sindical a finalisa bisando. 

REACCION HOTEL

Den un reaccion corto, e hotel pa medio di su departamento di recurso humano, a informa cu nan no tin ningun informacion pa duna riba e tema aki.