Formador: No ta keda cla pa gobierno nobo huramenta diabierna awor

ORANJESTAD – Formador Evelyn Wever Croes no ta keda cla pa diabierna pa e gabinete Wever I por huramenta. Esaki e formador a bisa na salida for di su audiencia cu Gobernador Boekhoudt diamars atardi. Mes momento ela bisa cu cosnan ta canando, aunke hopi mas lento cu a spera. “Mi ta pidi bosonan un poco mas di pasenshi” Wever a pidi comunidad tambe. E situacion actual ta pone cu pa diabierna e prome 9 miembronan riba lista di MEP, di AVP, e prome 2 nan di POR y 1 di RED lo huramenta dilanti Gobernador diabierna mainta den Parlamento. “Mundo no ta caba pasobra no tin un gobierno nobo. Dialuna parlamento nobo lo cuminsa traha” Wever a sigui bisa.

TARDANSA

Loke ta causando e tardansa ta e detayenan extra cu formador Wever ta confrontando durante e negociacionnan. A logra haya algun informacion di e formador, manera temanan cu ta tardando. Entre otro a menciona cu entre partido MEP y POR tin discussion riba un introduccion di un test di enseñansa cu kier duna cierto nomber y POR ta insisti riba e nomber, mientras cu MEP kier sa prome kico e test ta. Y asina tin mas cos cu ta canando poco poco pasobra e partidonan kier bay hopi detaya. A purba wak si por bay mas general e ora, pa por keda cla toch mas liher. Loke a keda cla, segun Wever, ta e parti di introduce cannabis medicinal, riba cual RED lo a bay di acuerdo pa laga cannabis recreacional pa awor. Tambe a toca e tema di Aruparking, unda cu partidonan ta basta riba e mesun liña. Segun Wever, a dicidi cu ta forma un comision cu ta bay investiga e impactonan y bin cu un recomendacion. Asina mes adelantando e resultado, Wever a sigura cu POR ta hopi receptivo pa eventual cambio.

GOBIERNO

E situacion cu ta surgi despues di diabierna, ta cu lo tin un gobierno di un signatura y un parlamento cu mayoria di otro signatura. Mientras cu esey no ta e situacion mas apropia, e no ta ni ilegal ni imposibel. De hecho, Wever a recorda e gabinete cu nan por ehecuta solamente casonan pendiente, pero nada mas. Tambe, den e parlamento nobo lo tin algun persona cu ta bay ta minister y parlamentario pareu. Pa ley, esaki ta posibel pa duracion di 3 luna. Segun Wever, esey no kiermen cu ta bay laga gabinete Eman (incluyendo esnan cu ta minister y parlamentario pareu pa e tempo ey) sinta 3 luna. A mustra finalmente, cu mientras cu ta negociando, lo no pone mas ‘streefdatum’ manera a haci anteriormente. Ora cu ta ora, lo bin dilanti y duna mas informacion.