Tur candidato pa Parlamento nobo a entrega ‘geloofsbrieven’

ORANJESTAD – Mientras cu partidonan MEP, POR y RED ta den pleno negociacion pa formacion di un gobierno nobo di coalicion, e proceso pa un Parlamento nobo tambe ta canando. Manera ta conoci, diabierna mainta awor Gobernador Alfonso Boekhoudt ta huramenta 21 miembro ‘nobo’ di Parlamento, basa riba e resultado di eleccion di dia 22 di september. NoticiaCla a confirma cu tur tres partido, cu nan respectivo candidatonan cu ta bin na remarke, a cumpli cu e rekisito prome cu e deadline cu tabata ayera na ciero di Censo di Aruba. Esey ta nifica cu diabierna awor, no mester tin problema pa e huramentacion tuma lugar. Tur cos ta mustra tambe cu e gobierno nobo lo no keda cla na tempo, pa por huramenta manera cu tabata e intencion di formador Wever Croes.

GELOOFSBRIEVEN

Segun Constitucion, despues di eleccion Conseho Supremo Electoral ta analisa e resulta y a base di e lista, ta manda un ‘carta di conocemento’ pa tur e candidatonan segun secuencia di lista politico cu a ricibi asiento cu ta bin na remarke pa drenta Parlamento. E carta aki a bay pa nan dia 2 di october ultimo, dunando cada candidato cu a ricibi e carta, 3 siman pa entrega esaki cu nan ta bay di acuerdo, of 2 siman pa nan rechasa esaki. Den e caso di partido AVP, 3 candidato a rechasa e carta y informa den e periodo stipula cu nan ta ‘gradici’ y ta bula afo. Eseynan tabata Mike Eman, Alex Schwengle y Richard Visser. Esey a pone cu tres candidato otro cu ta sigui, Marlon Sneek, Jennifer Reyes y Michael Lampe a bin na remarke. Nan tempo pa contesta, e ora ta bira mas laat cu e resto ya cu nan tambe ta haya e mesun tempo pa por reacciona. Sinembargo, den e caso aki, Sneek a confirma pa e portal aki cu tur e 9 candidato di e partido berde incluyendo e ‘tresnan nobo’ a cumpli caba cu entrega di e ‘geloofsbrieven’. Pa partido RED, Ricardo Croes a confirma cu e tambe a cumpli, Otmar Oduber di POR a confirma pa e candidatonan respectivo di e partido ey, y lider di MEP Evelyn Wever tambe a confirma pa e portal aki, cu e 9 promenan riba e lista a cumpli cu e tempo stipula pa entrega e cartanan necesario.

CAMBIO

Mientrastanto e formacion di gobierno ta continua su curso. Dado caso cu bin cambio den esunan cu lo forma e gobierno nobo, si esaki keda manera e formacion MEP, POR y RED manera cu e tarea di formador ta, e proceso pa e respectivo partidonan den parlamento tambe ta cambia. E ora e proceso ey ta cuminsa di nobo, unda cu un biaha mas, mester manda ‘carta di conocemento’ pa e candidatonan ‘nobo’ y nan tin e tempo pa reacciona etc. E proceso di formacion, contrario na informacionnan cu ta circulando, no tin un ‘deadline’ mara na dje, ya cu Gobernador no a duna uno. Ta simplemente un ‘streefdatum’ a wordo poni pa e formador, cu porta a wordo malinterpreta.