Aruba Rotary ta conmemora Dia Mundial di Polio cu EndPolio Fun Walk Run

ORANJESTAD - Awe, 24 october nos ta conmemora e World Polio Day. E dia aki a wordo dedica door di Rotary International pa conmemora e fecha natalicio di Jonas Salk, ken a lidera e prome team cu a traha un vacuna contra poliomyelitis.

Poliomyelitis ta un malesa haltamente contagioso cu ta afecta mas tanto mucha mas jong cu 5 aña di edad. Polio, manera e ta wordo yama ta un virus cu ta contagia di persona pa persona. E virus ta pasa tipicamente via awa contamina, pero tambe e por pasa atraves di spetters ora bo tosa of nister. E por ataca e sistema nervioso di un persona, y den sierto caso, por causa paralisis. Aunque no tin cura, ta existi un vacuna cu ta safe y efectivo. Ta e vacuna aki Rotary hunto cu su partners a uza pa immunisa over 2.5 billion mucha na mundo.

Rotary, World Health Organization y UNICEF a cuminsa cu e Initiativa Global pa Eradica Polio na 1988. Na aña 2007 e Bill & Melinda Gates Foundation a join Rotary den e compromiso pa caba cu polio.

Desde 2013, the Gates Foundation a duna (match) 2 florin pa cada florin cu Rotary a recauda pa caba cu polio, dus 2-to-1. En total e fundacion ta duna $35 million pa aña. Rotary hunto cu e fundacion Gates Foundation, a contribui cu mas di $1.6 billion na e causa aki.

Desde cu a cuminsa e action contra polio, a logra reduci e cantidad di casonan di polio cu 99.9 porciento. A logra yega na mas di 2.5 billion mucha cu a vacuna. Awe tin menos caso di polio cu nunca antes den mundo. Pero no por stop awo! Mester yega na cero (0) caso. Si no eradica polio, milles di mucha por keda paralisa.

Na e momento aki tin solamente 3 pais na mundo na unda tin polio. Esaki ta Afganistan, Pakistan y Nigeria. Na aña 2017 a registra na:

- Afganistan 6 (2014 28)

- Pakistan 5 (2014: 306)

- Nigeria 0 (2014: 6, 2015: 0)

Si nos no eradica polio, den 10 aña nos lo por wak mas di 200,000 caso nobo cada aña. Nos mester caba cu e virus aki pa den futuro muchanan na mundo por ta safe.

EndPolio Fun Walk Run?

Rotary Club of Aruba ta organisa un EndPolio Fun Walk Run dia 19 di november 2017. E evento ta pa consientisa pueblo di e e Polio virus. E caminata lo cuminsa pa 5:00 p.m. y lo sali for di Fisherman’s Hut pa Arashi. E lo ta di 5 kilometer y lo por cana of core e trajectoria. Inscription ta AWG 20 y lo tin un dri-fit shirt pa cada participante. Na final di e walk and rub lo bai tin rifa di diferente premio atractivo bao di e participantenan. E evento ta wordo organisa pa Rotary Club of Aruba hunto cu su partners Rotaract Club of Aruba, Interact Club of Aruba y Xavier University, School of Medicine.

Den curso di e dianan cu ta bin, lo duna mas informacion na unda pa registra. Sigui Aruba Rotary riba social pa mas informacion.