Siman ta habri sin acuerdo riba programa di gobierno pa coalicion

ORANJESTAD – Siman a habri sin cu a logra firma un acuerdo pa loke ta programa di gobierno di e coalicion nobo. “Na e momentonan aki no tin noticia pa meld riba e proceso di formacion, diferente cu locual mi a declara diabierna den Conferencia di Prensa” formador Evelyn Wever Croes a informa prensa diadomingo. “Nos ta den e fase di traha riba e programa y nos mester tuma nos tempo pa esaki. E ta tuma mas tempo cu mi a anticipa y mi ta pidi mi disculpa pa esaki. Pero asina cu mi tin algun novedad, mi ta informa prensa inmediatamente” Wever a sigui bisa.

FIRMA

E intencion tabata pa for di diabierna atardi laat firma un acuerdo riba e programa di gobernacion. Pero durante curso di e dia, a resulta cu esey no tabata bay logra. E ora a mustra cu trabounan tabata caba mas cu a spera y cu ta trahando pa e ta diasabra den curso di dia. Esey tampoco no a logra y diadomingo a bin confirmacion cu e situacion ta mas complica, y cu ta sigui traha riba dje.

ISSUES

Mientras cu tur hende ta ‘aas’ riba e asunto di cartera, tin mas asunto cu ta complicando e asunto. Parce cu partinan di e programanan, aunke basta similar, tin ‘issues’ cu ta complicando e asunto, y ta delicado y mester di tempo pa por wordo ‘acepta’ y ‘bendi’ entre e partidonan cu tin intencion di forma un coalicion.

PARLAMENTO

Tanten cu e formacion ta continuando, e proceso pa parlamento ta cana paralelo, cu ta nifica cu si pa diahuebs no tin un gobierno cla ainda,- cu ta mustra hopi probabel-, cu e promenan riba e respectivo listanan (conforme nan aceptacion) lo forma e 21 miembronan di parlamento. Despues esaki lo wordo adapta segun e candidatonan pa posicion di minister keda clarifica. Den pasado, na Corsou p.e. tabatin un situacion cu a surgi cu e parlamento su mayoria diripiente a bira diferente cu e gobierno na mando, cu a consecuencia cu a cambia e gobierno mesora tambe na nan fabor. Den e caso actual, esey tecnicamente y practicamente por sosode, segun Wever mes a splica e portal aki recientemente. Si e ta e intencion, no ta conoci ainda.