Welga di abogadonan di piket ta sigui

ORANJESTAD – Orden di abogado a topa cu formador Evelyn Wever Croes diahuebs, pero e welga di abogadonan di piket ta on ainda. Asina deken di e orden Jeanot de Cuba a confirma pa NoticiaCla diahuebs atardi. “Nos tabatin un bon gesprek, pero nada concreto ainda. Nos ta den espera di su contesta”, de Cuba a bisa. Segun de Cuba, e motibo cu ta sigui cu e welga, ta pasobra minister demisionario Arthur Dowers (husticia) a anuncia di lo rectifica e LB Ham, pero parcialmente. “Pues e welga ta on ainda!” de Cuba a finalisa bisando.

E CASO

 “Loke a keda publica riba NoticiaCla ta berdad”, abogado y deken di Orden di Abogado, mr Jeanot de Cuba a bisa e portal aki e diaranson mainta. E ta reacciona riba e noticia cu a keda publica cu abogadonan di piket ta drenta den accion diaranson merdia 12’or pa protesta. Mas cu esey e no kier a bisa sinembargo, debi cu a manda un carta pa formador Evelyn Wever Croes pa inform’e di e situacion riba e tema. Y ta prefera pa atende cu e asunto cu ne prome cu bay den mas detayes. Pero ela confirma e articulo su contenido, y a spera cu por haya atencion di e formador mas lihe cu ta posibel. Algo cu a sosode tambe.

PROTESTA

Manera cu e portal a raporta diaranson, abogadonan di piket a bay den accion atrobe, manera cu nan a haci aña pasa caba. Den un carta pa e.o. minister di husticia demisionario, Orden di Abogado su deken ta informa cu debi cu no a ricibi contesta riba un carta di 12 di october ultimo, abogadonan lo drenta den accion pa loke ta piket atrobe. Esey ta encera tambe cu pa casonan cu ta andando caba, abogadonan di piket lo no asisti e clientenan aki.

E CASO

E problema ta cu contrario na palabracionnan haci aña pasa despues cu abogadonan encuestion a bay den accion pa 30 dia y logra un aumento di pago pa nan trabou como abogado di piket, no a honra e acuerdo awor. Mientras cu a cumpli parcialmente, a baha e suma, y contrario na un aumento palabra pa 2018, esaki a keda afo. Tur a bin na discubrimento ora cu a publica e cambio den e asina yama LB Ham, y e Orden di Abogado a nota e cambio di palabracion. Algo cu nan no a bay di acuerdo cu ne. A manda un carta dia 12 di october, riba cual no a haya reaccion. Esaki a pone cu entrante di diaransonmerdia, abogadonan di piket a den protesta atrobe.