Simar: Accion pasivo di colecta firma pa airco na tur scol

ORANJESTAD – Sindicato di maestro Simar a cuminsa cu un accion pasivo di colecta firma pa airco na scol. E intencion ta pa nan colecta firma di por lo menos 65% di e veld di maestro. A cuminsa cu e accion dia 9 di October y ta termina esaki pa fin di luna awor. E intencion ta pa papia despues cu e minister nobo di enseñansa riba e tema. Asina a informa durante un conferencia di prensa diahuebs riba e tema.

REUNION URGENTE

SIMAR a yama un reunion di caracter urgente ayera atardi, caminda inicialmente lo a papia di e posibilidadnan con trata cu e dianan calor di e siman aki, ya cu te cu dialuna mainta no a ricibi reaccion di minister riba SIMAR su proposicion. E punto aki no tabata vigente mas, mirando cu net prome cu scolnan primario a termina dialuna, e desicion di SKOA y di minister Hooyboer-Winklaar pa alumnonan bay cas mas trempan e siman aki, a drenta. E otro punto pa cual e reunion a ser yama tabata e falta di airco den clasnan rond di Aruba. Tambe a trata e problema cu docentenan di movecion y salud. Tin cu ta traha den solo (merdia), otro no tin un “overdekte” of un sala adecua cu bon ventilacion.

Un cantidad relativamente grandi di docente tabata presente. Durante e reunion diferente punto a bin dilanti. Entre otro a trata e estado deplorable di sierto scolnan, e hecho cu algun ta bieuw y mester di renobacion complete di e sistema di coriente, e costonan pa cu esakinan y tur loke lo mester tuma lugar prome cu yega na airco pa tur local. Tambe a papia di cuanto scol cu no tin airco y e motibonan pa cual esaki ta necesario.

SIMAR a trece e parti di ley cu ta protehe e empleado dilanti y tambe e necesidad pa uni pa logra e meta. E reunion a cera cu un comicion forma pa docentenan di diferente tipo di enseñansa cu lo bay traha ariba un “stappenplan”. Riba termino corto lo cuminsa cu un accion di firma cu lo inicia den e proximo dianan caba. E accion aki ta pa colecta firma di tur cabesante, director, manager y docente cu ta sostene e hecho cu tur clas mester tin airco y cu tur docente di movecion y salud mester tin un espacio fresco pa eherce su trabou. E meta ta pa e documento aki ta cla na tempo pa ser entrega hunto cu e plan di e comicion na e siguiente minister di enseñansa.

SIMAR y tur esnan presente ta conciente cu un trabou manera esaki lo costa pais Aruba hopi y lo tuma su tempo, pero lo percura pa huntu cu su miembronan para ariba e importancia, e derecho di e empleado y e seguridad di tur esnan cu ta biba den scolnan. Tambe lo percura pa e plan ser ehecuta y no bira un plan cu lo tuma demasiado aña.