Ekstradicion ex minister sospechoso Jamaloodin admisibel

CARACAS - Tribunal Supremo di Venezuela a dicidi dia 4 augustus 2017 cu e peticion pa extradicion di G.R.M.J. Jamaloodin(40) riba peticion di Ministerio Público (OM) di Corsou ta admisibel. Na november 2016 a pidi autoridad Venezolano extradicion di Jamaloodin cu na Corsou ta sospechoso den investigacionnan Germanium, Passaat y Maximus. E extradishon a ser pidi numa na momento cu Ministerio Publico a pidi Jamaloodin pa meld su mes boluntariamente na Corsou. E no a duna oido na e peticion aki.

GERMANIUM

Den investigacion Germanium ta sospecha Jamaloodin. cu, komo Minister di Finansa, e tabata envolvi den malversacion di 450.000 florin na placa di subsidio pa mehoracion di un cancha di deporte Divi Divi den bario di Steenrijk. Esaki den e periodo 2012-2014.

PASSAAT

Investigashon Passaat, un trayektoria paralelo di investigacion Biento, ta relata cu pasonan castigabel den cuadro di realisacion di e asina yamá ‘inkeerregeling’ na Belastingdienst na 2011. Ta trese Jamaloodin den esaki cu falsificacion di documento (valsheid in geschrift).

MAXIMUS

Den investigacion Maximus ta sospecha Jamaloodin di envolvimento den asesinato di Helmin Wiels na mei 2013. Mas particular ta sospecha Jamaloodin cu hunto cu otronan a duna encargo pa mata Helmin Wiels y paga tambe pa esaki.

PETICION 

Relaciona cu e peticion di extradicion di Jamaloodin na november 2016, a detena na maart 2017. Esaki a tuma luga door di autoridad Venezolano. Desde e fecha ey e ta den detencion di extradicion (uitleveringsdetentie).

VENEZUELA

Tribunal Supremo di Venezuela a studia e documentonan y a scucha tur partido den e caso di peticion di extradicion y a yega na e conclucion cu tin suficiente base pa extradita Jamaloodin pa Corsou, esaki a base di e investigacionnan Germanium, Passaat en Maximus. Contra e desicion aki no tin posibilidad pa apelacion. Pa duna autoridad di Venezuela y Corsou e posibilidad pa traha den tur trankilidad riba transporte di Jamaloodin a dicidí di parti di Ministerio Público pa no duna informacion na prensa riba e extradicion cu ta bai tuma luga. Ta wardando aworakí riba e proceso administrativo pa sigui su caminda na Venezuela. Ministerio Publiko (OM) Corsou ta hopi satisfecho cu e forma cu autoridad Venezolano a duna nan coperashon na ehecushon cuidadoso di e extradicion. OM ta confia cu e transferencia real tuma luga riba termino cortico.