HARPA ta e prome fundacion Arubiano na Den Haag

DEN HAAG - Diabierna 13 di october 2017 Fundacion Harmonie Arubaanse Participatie (Fundacion HARPA) a bira un realidad. E prome fundacion di studiante Arubiano dirigi door di studiantenan na Hulanda. E directiva di e fundacion ta consisti di 4 studiante y un persona grandi bon conoci den municipio di Den Haag ya cu e persona aki pa hopi aña ta miembro di diferente fundacion na Hulanda. E lo guia e grupo di hoben aki, pero tambe di trata pa tin un integracion entre hoben y nos hende grandinan. Prome cu e fundacion a inicia oficialmente ya e miembro di directiva a tuma contacto cu municipio di Den Haag pa presenta nan mes y splica kico ta e obhetivo di e fundacion. Meta di HARPA ta pa duna e cuidadanonan for di Aruba na Hulanda un cara confiabel y amabel door di stimula nan participacion den e pais y conhuntamente cu nan promove e cultura di Aruba. Pa esaki lo entama tur sorto di actividad concerni pa logra e meta. Nan lo purba di e manera aki pa e studiantenan no solamente topa cu otro, sino realisa varios actividad educativo, social y cultural pa asina duna un aporte na e municipio. Municipio a otorga e fundacion subsidio pa dos di nan programa educativo y cultural. Dia 26 di november 2017 lo tuma e prome evento di Dande Festival na Den Haag. Nan lo purba di promove nos cultura bou di e studiantenan na Hulanda cu e intencion cu studiante y persona mas grandi lo participa na e evento. Fundacion HARPA kier gradici señora Nuris Dabian, coordinadora di Asunto Social y Cultural di Arubahuis, pa su gran apoyo na e hobennan. E ta e persona cu a motiva e grupo di hoben aki pa lanta e fundacion. Riba potret por mira e miembro di directiva cu ta consisti di (di robes pa drechi): Jack Rasmijn (secretario), Astrid Contreras (PR), Saúl Pozo Aldea (Presidente), Brittney Koolman (miembro) y Pierre Jourdain (tesorero). Pa participacion den e Dande Festival na Den Haag por tuma contacto cu e fundacion via nan pagina di facebook Stichting HARPA of manda un mail na stichtingharpa@gmail.com.