Autoridad a localisa 2 curpa sin bida na Baby Beach mainta

SAN NICOLAS - Diamars pa 10:35 di mainta central di polis ta haya un yamada cu lo a wak un curpa sin bida na baby beach na altura di ex Nanki. Na yegada di patroulle ta topa cu e persona cu a yama y ta conta cu dos turista lo a aserc'e y bis'e cu nan a wak un curpa ta drief. Polis ta cuminsa cu un buskeda hunto cu personal di Kustwacht. Despues di un rato personal di Kustwacht a drenta awa pa wak si por topa cu e curpa. Pa 13:00 ta bin haya un curpa sin bida patras di ex Nanki. Pa 13:10 ta haya un melding via Kustwacht cu nan helicopter a bin wak un otro curpa ta drief banda di e rif na Rodgers Beach. Na e momento eynan tabata tin personal di marine ta train y na unda nan yuda saca e curpa pone riba rif. Kustwacht a yega na e rif y a pone e curpa sin bida den nan boto y trece na e pier di ex Nanki. Pa 14:45 Dr Texiere ta constata morto di e prome curpa sin bida di un hende homber inicial A.R.C. nacionalidad Venezolano y pa 14:50 dr ta constata morto di e di dos curpa haya sin bida. Ta trata di un hende homber tambe, pero no a haya identificacion riba dje. E curpanan a wordo tuma den beslag. E caso aki ta bou investigacion. Personal di BFTO, recherche y slachtofferhulp a presenta na e sitio di e sucedido. Un danki na personal di brandweer y Kustwacht cu a yuda te na final. Cuerpo Policial ta manda palabra di condolencia na famianan di e fayecidonan.