Plasterk a denuncia parlamentario van Putten oficialmente

DEN HAAG/ORANJESTAD – Minister di Asuntonan di Reino Hulandes Ronald Plasterk a haci denuncia contra parlamentario Clyde van Putten di St Eustatius. Esaki pasobra van Putten a declara publicamente cu si militarnan Hulandes bin St Eustatius, lo kima y mata nan. Oficina di representacion Hulandes na Aruba a confirma esaki. “E denuncia a wordo haci y ricibi na ministerio public na Bonaire” tabata e reaccion pa NoticiaCla.

PERSECUSION

Vocero di ministerio publico Norman Serphos a confirma esaki tambe, aunke no por duna mas detayes riba e tema, cu solamente cu PG awor lo determina via un investigacion preliminar, si ta bay persigui van Putten of no. “Esey por tuma su tempo” Serphos a bisa e portal aki.

PLASTERK

Plasterk mes a reacciona publicamente tambe. “Declaracionan di Van Putten ta completamente inaceptabel. Mi a haci denuncia, pasobra e ta haci yamada di violencia contra militarnan Hulandes. Esey ta mas serio si bo realisa cu ta e mesun militarnan cu luna pasa ainda a traha masha duro pa yuda hende cu e daño di horcan (Irma). Ta keda awor na OM pa tira un bista (riba e caso)”.