Condé Nast Traveler: Bucuti & Tara Beach un di e mihornan den Caribe

EAGLE BEACH - Condé Nast Traveler a anuncia awe nan resultado di e di 30 edicion anual di “Readers’ Choice Awards”, unda cu Bucuti & Tara Beach Resort a wordo reconoci como un di e Top 40 hotel di Caribe. “Un danki na tur nos distingido bishitantenan pa a nombra Bucuti & Tara Beach Resort como un di e mihornan den region Caribe,” segun Ewald Biemans, fundador y CEO. “Duna e mihor servicio ta nos deseo sincero, y un biaha mas mi ta sumamente orguyoso di nos team na Bucuti”.

Mas di 300,000 lesado di Condé Nast Traveler a deposita nan voto y duna puntuacion y comentario tocante nan vacacionnan recien na diferente ciudad, isla, hotel, crucero, aerolinea y aeropuerto.

Como ganador un biaha mas di e prestigioso honor aki, Aruba su resort pa adulto ta un di e dosnan cu a gana na Aruba. Bishitantenan rond di mundo ta opta pa Bucuti pa su excelente servicio, su ambiente sumamente romantico y su compromiso na sostenibilidad.

E Condé Nast Traveler Readers’ Choice Awards ta conoci pa e mihor di e mihornan den biahe. Bou guia di ‘Editor in Chief’ Pilar Guzmán, ‘the Readers’ Choice Awards ta sumamente selectivo y hopi specifico den scohe loke ta inspira y satisface biaheronan rond di mundo. E Readers’ Choice Awards ta wordo publica den luna di November den edicion di Condé Nast Traveler, y lo ta disponibel na benta den fin di October 2017. E lista completo por haya online na CNTraveler.com/rca.