Ambtenaar sospecha di fraude na examen bureau lo bringa su retiro

ORANJESTAD – E trahado di examen bureau cu ta oficialmente bou di investigacion, esta M.C., a ricibi su ontslaglandsbesluit diaranson y como tal a wordo retira ‘per direct’. Informacion cu NoticiaCla.com a compila ta confirma cu M.C. a laga sa cu e lo bringa su caso, mirando cu e ta haya e forma con tur cos a bay, no corecto. E siman aki tambe Ministerio Publico a confirma cu investigacion a termina riba e persona aki y cu oficialmente e ta wordo considera como un sospechoso. Awor ta keda na hues comisario si ta tuma paso legal contra dje of no.

E caso ta uno cu ta data for di aña pasa caba. NoticiaCla.com a bay investiga y a bin saca afo cu e caso ta data di april 2013 riba sospecho cu e persona aki lo tabata actua sospechoso. Tabata e aña aki na comienso di aña cu e hefe director di C a confronta C cu e resultado di e investigacion, despues di cual a dicidi di transferi C pa un otro departamento. E cos a keda keto, publicamente te ora cu siman pasa e informacion di su caso a bin sali den medionan di comunicacion.

Loke a duna e caso mas atencion ta e lasonan familiar cu e persona aki tin cu politica, unda cu e tin un prima cu ta lider di fraccion di e partido mas grandi di oposicion, y un otro ta minister di asuntonan social. Cu e lasonan aki, e atencion y luz ta mas grandi riba e persona. Fuera di esey, e mes ta un persona hopi conoci den comunidad, unda cu hopi ta puntra con esaki por a pasa.

Manera cu ya caba NoticiaCla.com a trece dilanti, ta e reaccion di un di e familiarnan di C, esta e lider di e partido MEP, Evelyn Wever Croes. “Ta importante pa duna husticia espacio pa haci su trabou y determina kico precies e caso ta”. Esey pues tabata e reaccion di lider di partido di oposicion MEP Evelyn Wever na NoticiaCla.com riba e asunto di supuesto iregularidad den un asunto di naturalizacion, y mas specifico den asunto di toetsing pa por haya pasaporte hulandes.