Formador: Formacion di gobierno cu base amplio lo tuma tempo

Formador: Formacion di gobierno cu base amplio lo tuma tempo

Posted on 10/16/2017 9:21 pm AST | Updated on 10/17/2017 7:37 am AST

ORANJESTAD - Manera NoticiaCla a raporta caba, awe mainta den edificio di APA, a inicia e reunionnan di formacion di e proximo gobierno di nos pais entre e tres partidonan. Lidernan di tur tres partido y nan conseheronan y miembronan di comision tawata presente pa asina duna inicio na e negociacionnan cu lo tuma luga pa asina pronto Aruba conoce un gobierno di coalicion manera pueblo a pidi p’e. Lider di Partido MEP, Evelyn Wever-Croes, kende tambe ta Formador di gobierno nobo ta amplia riba e procedura di formacion di gobierno como lo siguiente: “Diahuebs ultimo, mi a ricibi e encargo di Formador for di Gobernador y den cuadro di esaki nos lo bay cuminsa cu diferente reunionnan. Mi a haya instruccion pa purba forma un gobierno di coalicion entre partidonan MEP, POR y RED.

RUMORNAN

"Den e ultimo dianan desde cu Gobernador a nombra mi como Formador, tin basta rumornan y speculacionnan ta circula di diferente aspectonan di formacion. Ta asina cu te hasta e gobierno a wordo forma caba cu varios diferente minister. Sinembargo, tur esakinan no ta corecto y ta completamente falso. Awe nos ta bay cuminsa. Y e procedura ta bay tuma luga den e siguiente fasenan: Acuerdo di Formacion: Esaki ta e combersacionnan tocante e puntonan den lineanan general pa yega na un programa di gobernacion. Programa di gobernacion: Despues cu nos tin e Acuerdo di Formacion defini, nos lo bay na e programa di gobernacion. Tur e puntonan cu partidonan a bay campaña cu ne, ta wordo descuti pa asina cada vision wordo inclui den nos programa di gobernacion. Ta importante pa tuma tempo pa descuti tur e puntonan aki pa asina nos por yega na palabracionnan concreto pa brinda pueblo un gobierno stabiel. Reparticion di Carteranan: Una bes cu nos yega na e fase aki, Partidonan ta bay bek den nan seno pa palabracionnan kende lo bira candidatonan pa minister cu lo representa nan partido pa eherce e diferente funcionnan. Proceso di Screening: Candidatonan apunta pa bira minister lo pasa un proceso di screening. Una bes cu e resultado di screening drenta, nos lo entrega e reportahe na Gobernador, cu e deseo di a forma un gobierno cu un base amplio manera Gobernador a pidi.” Wever a sigui bisa. Wever-Croes ta sigui bisa cu no solamente el a haya encargo pa forma e proximo gobierno sino tambe pa reuni cu diferente instancianan na Aruba, gremio, departamento di gobierno, sector priva y instancianan social y caritativo. Nos lo bay tene cuenta cu esnan cu ya caba a reuni cu informador y lo invita e otronan durante e simannan aki.“Ta bay ta dos trayectoria pareu cu lo tuma luga den e dianan aki, ambos sin duda lo bay ta hopi pisa, pero atencion principal ta pa forma e gobierno." Wever a sigui bisa. 

PRENSA

Wever-Croes a conclui bisando cu lo tene prensa informa lo maximo posibel di e procedura di formacion di gobierno nobo. Alabes e ta pidi pa prensa duna espacio y trankilidad pa yega na un bon acuerdo. Y ta priminti cu manera tin algo di informa, lo yama prensa pa asina pueblo tambe keda bon informa di henter e procedura.

  • Partido AVP ta entama caso sumario contra gobierno

    Partido AVP ta entama caso sumario contra gobierno

    ORANJESTAD – Partido AVP ta hiba gobierno di Aruba corte. Miembro y partido y parlamentario pa e partido berde Richard Arends a confirma esaki pa NoticiaCla. Segun Arends, e motibo ta cu gobierno a prohibi nan di tene un actividad den un di e MFA otro siman diamars. E partido ta mustra cu ta e siman aki mes a firma contract y paga pa e uso di e lugar (MFA Noord), pa un dia despues nan bin tende di e manager di e lugar cu no por tene e evento eynan, pasobra ‘e ta un evento politico’. E partido ta considera esaki sensura, persecucion politico y un medida contra e partido. Nan ta mustra cu recientemente partido RED a tene un evento na e MFA na Paradera, y partido RAIZ tambe a tene un lectura den un di nan. Pues diripiente AVP no por tene un evento eyden. Como tal, a duna abogado instruccion pa entama un caso sumario (mirando e tempo urgente) pa wak si ainda otro siman diamars por tene e evento. Ta trata di evento pa informa pueblo riba e medidanan cu gobierno ta bay tuma entrante 1 di juli. Intento pa haya reaccion di prome minister Evelyn Wever riba e tema, ainda no tabata exitoso.

  • Oduber: Directiva Parke Arikok a haci intento di ‘coup’

    Oduber: Directiva Parke Arikok a haci intento di ‘coup’

    ORANJESTAD – Desde awe mainta Parke Arikok ta manera un barco sin timon. E director di e parke Natasha Silva mes a confirma esaki awe mainta den un carta na e minister encarga Otmar Oduber. E directiva di 4 persona, manera ta conoci caba, a entrega su retiro ‘en bloc’ per direct un dia prome y awe mainta Oduber a reacciona yamando e asunto un ‘coup’ di e directiva, durante un conferencia di prensa. Silva mientrastanto awe mainta a pidi intermediacion di e minister pa por resolve e situacion urgente aki.

  • Proyecto di renobacion di e pier dilanti Riu Antillas ta cla

    Proyecto di renobacion di e pier dilanti Riu Antillas ta cla

    ORANJESTAD – E pier dilanti Riu Antillas a keda completamente renoba. Manera por corda e pier aki tabata den un mal estado, den deteriora y peligroso pa haci uso di dje. E toren manera e ta ser yama den boca di pueblo, ta safe un biaha mas pa uza. Hopi ta nos hendenan local pero tambe e turistanan cu ta haci uso di e toren aki. E proyecto aki a wordo realisa door di un “Public-Private Partnership” conhuntamente cu gerente general di Riu Antillas. “ Di e manera aki Gobierno y sector priva ta traha hunto pa mehora e producto Aruba y den e caso aki sector priva a mustra disponibilidad pa cubri e inversion aki”, gobierno a informa pa medio di un comunicado.

  • Casi 20 edificio di gobierno para bashi sin uso pa nan

    Casi 20 edificio di gobierno para bashi sin uso pa nan

    ORANJESTAD - Actualmente tin un lista di casi 20 edificio di Gobierno cu no ta den uso. For di ministerio di infrastructura, NoticiaCla a compronde cu departamentonan DOW y DIP a hinca un plan den otro awor pa mira kico por wordo haci cu e edificionan aki. Siguientemente lo papia cu cada Ministerio y lo fiha un lista di prioridad considerando cu ta trata mas di 15 mil meter cuadra di propiedad/edificio di Gobierno cu no ta den uso na e momentonan aki.

  • Plataforma di DTP y polis lo combati taxi piratanan

    Plataforma di DTP y polis lo combati taxi piratanan

    ORANJESTAD - Recientemente Minister Chris Romero y su colega di Husticia, Andin Bikker, a reuni cu Departamento di Transporte Publico y Cuerpo Policial pa trata e problematica di taxi pirata. E reunion aki tabatin como meta pa mediante dialogo di ambos Minister y nan departamentonan concerni, crea un maneho mas efectivo y eficiente pa logra combati e problematica aki.

  • Gobierno di Aruba ta sigur cu nan ta prepara pa e temporada di horcan

    Gobierno di Aruba ta sigur cu nan ta prepara pa e temporada di horcan

    ORANJESTAD - Den cuadra di temporada di horcan, Minister President Evelyn Wever-Croes dialuna mainta a reuni cu miembronan di Beleidsteam na Rampenbureau. Esaki ta e organo mas halto ora ta trata calamidad. E Beleidsteam tin un plan di calamidad cu ta inclui Training HUREX 2018. E aña aki ta spera un temporada di horcan average, pues ni hopi ni poco horcan.

  • COMPRA
  • Powered by SETAR