Rubiano riba buelo KLM a experencia e emergencia na Irlanda

AMSTERDAM – “Nos a sinti un zonido duro y nos a sinti con e avion a cuminsa baha diripiente”. Na palabra pa NoticiaCla.com, Kimberly Cabenda-Giel, un di e arubianonan riba buelo di KLM cu mester a haci un aterisahe di emergencia na Irlanda diaranson. Manera cu NoticiaCla.com a raporta mas prome diaranson, e buelo cu a origina for di Aruba, cu transito na Bonaire a haya un fayo pa cual e mester a desvia di ruta. Den e prome raporta, no tabata conoci si tabatin Rubiano abordo. A resulta cu tabatin varios. Tur mientrastanto a yega Hulanda sano y salvo.

Segun Cabenda, e zonido duro cu nan a tende den pleno buelo, tabata cu nan a paga e motor. “Esey tabata banda di 3.30am ora di aruba. Mi casa tabata drumi e ora ey y el a lanta dor di e zonido y e dor cu el a sinti e avion cuminsa baha” Cabenda ta sigui conta. “ Un 15 pa 20 minuut despues nan a informa nos cu tin un problema cu e motor cu mester a shut e down, pues e avion lo keda bula cu un motor so y cu nan ta hisa speed pero esey kiermen cu gasoline lo caba mas lihe”. Ta e momento ey, e pasaheronan a wordo informa cu nan mester a haci un aterisa di emergencia na Shannon, Irlanda, un ora y mey di buelo ainda.

“Na e momento ey sigur bo ta sinti spanta” Cabenda ta sigui conta. Pero mes momento, nan tabata sa cu nan tabata den bon man. “ E piloto y crew a mantene tur hende trankil. Tur cos a bay smooth. Mi mes tabata trankil despues poniendo tur confianza den Dios” Cabenda a sigui bisa. E aterisa mes a bay smooth. “Nos a mira hopi brandweer, e piloto a bisa nos cu esey ta un normal procedure”

Unabes cu e avion a yega Shannon, e grupo di Rubiano mester a warda basta pa un otro avion yega.” Nos a sali te 3.30pm (ora di eynan). Nos a yega Hulanda 1ora y mei despues. Segun Cabenda, tur hende sigur a keda hopi cansa. “E tabata echt un long day. Pero contento cu toch nos por a yega sano y salvo na nos destinacion” Loke despues Cabenda ta corda tambe ta cu ya na Boneiro nan tabata drechando e mesun motor ey como 30 min. “Despues toch nan a laga nos bay”. Obviamente, e motor no a keda bon, cu a resulta den e odisea cu e pasaheronan aki a pasa aden.

Tabata diaranson cu un avion tipo airbus A330-200 di KLM (buelo KL 765) cu a sali for di Aruba y pasa Bonaire cu 221 pasahero abordo rumbo pa Schiphol, mester a desvia pa e ciudad irlandes Shannon. “Tabatin problemanan tecnico cu ta wordo investiga aworaki. Tur pasahero ta wordo busca cu un otro avion awe mes y ta wordo transporta awe mes pa Amsterdam” segun un fuente di KLM a bisa e momento ey.