CJ: Aruba prome luga entre e miho playanan den Caribe

ORANJESTAD – E siman aki, e website Caribbean Journal a publica su lista di e miho playanan den Caribe. Esaki ta nan recomendacionnan pa e industria turistico y na bishitantenan pa loke ta e proximo aña, esta 2018. Aruba Tourism Authority cu hopi satisfaccion y orguyo a tuma nota cu Aruba ta ocupa nada menos cu tres luga den e top 25 aki na unda nos isla ta wordo menciona den e prome dos lugarnan. Nos isla ta destaca un biaha mas como un di e miho destinacionnan den Caribe y na mundo danki na, entre otro, su santo blanco y awa blauw cla. E distincion aki ta laga nos tur realiza e balor di nos recursonan natural y con importante ta pa nos mantene y proteha nan como elemento valioso di nos producto turistico, pero tambe como herencia pa futuro generacionnan di Arubianonan.

BEST BEACHES

'The Best Beaches in the Caribbean 2018" ta un articulo cu un y tur por lesa riba www.caribjournal.com den cual Aruba su playanan ta bin dilanti na tres ocasion. Na prome luga ta ilustra Boca Grandi ubica na e costa oost di nos isla. Boca Grandi ta describi como un punto popular pa kitesurfers y cu ta conta awo cu un establecimento turistico, esta e Tortuga Bar. Na di dos luga ta nos joya mundial cu ta Eagle Beach destacando con hancho e ta y su santo blanco. Na e di 7 luga ta wordo menciona Palm Beach caminda ta elogia su awanan trankil y awa color turkesa.

CONTEXTO

Pa pone e balor di nos playanan den contexto, por splica cu e unico otro isla cu mas mencion riba e lista di Caribbean Journal tabata Bahamas cu 4 diferente playa. Consistiendo di mas di 700 isla cu hunto ta suma mas di 3.5 mil kilometer largo, Bahamas tin 51 biaha mas hopi costa cu Aruba, cu tin 68.5 kilometer. Aruba por ta hopi orguyoso di por ofrece asina tanto luga bunita y cu ta destaca riba hopi otro paisnan mas grandi. Otro islanan cu a figura den e top aki tabata Republica Dominicana, Jamaica y Trinidad, entre otro, cada un cu un playa.

FELICITACION

Aruba Tourism Authority ta felicita pueblo di Aruba cu, diferente di nos bishitantenan, tin e disponibilidad di disfruta di e tres playa aki y hopi otro mas, na cualkier momento di aña cu e ta desea. Tambe ta haci un invitacion pa sinti nos mes hopi orguyoso y cuida nos playanan mas tanto cu por. Ban sigui mantene nan limpi y asina percura pa e ambiente agradabel cu nos playanan ta ofrece. NOTA: Potret cortesia Caribbean Journal.