Placa di FMSA y VAS atrasa tin cu drenta prome cu fin di aña

ORANJESTAD – Entre luna di october y november, gobierno lo ricibi e suma pendiente di e settlement di e deal di Valero cu ta entre 56 pa 60 miyon florin. Minister demisionario di finanza Angel Bermudez tin tur confiansa cu esey lo sosode tambe. Berdad tabatin un retraso pa e pago, pero esey tabata debi cu mester a formalisa un ke otro y esey a keda cla siman pasa. E mandatario a sigura NoticiaCla LIVE durante un programa recien, cu e placa lo drenta y cu gobierno lo ricibi esaki den dos paga. Por lo menos prome cu fin di aña. Entre nan e placa di FMSA (Fuels Marketing & Supply Aruba) y un suma en efectivo.

BBO/BAZV

E loke ta falta tambe pa drenta prome cu e fin di aña aki, ta sumanan di impuesto cu ta presupuesta, pero no a drenta ainda. Entre otro por pensa riba esnan cu mester a paga mas prome den aña, pero cu a pidi un ‘uitstel di pago’, y a haya un termino mas largo di pago. “Den e di 4 cuartal aki un parti grandi di VAS (Voldoening op Aangifte Systeem) 2016 cu tin cu drenta, pa esnan cu a pidi uitstel na mei ora cu nan a haci nan aangifte. Tambe tin diferente compania grandi cu a haci aangifte, pero cu no a paga full e suma cu nan debe pa 2016. Asina belasting dienst pa medio di su directora a duna un splicacion na e colegio di e sumanan cu tin pa drenta e di 4 cuartal, pa por cubri cu e parti di presupuesto di entrada di e aña aki.