Plachi di number pa 2019 lo ta mas cu djis un plachi regular

ORANJESTAD – E plachinan di auto pa 2019 ta bira mas cu simplemente un ‘number di auto’. Asina director di departamento di impuesto (DIMP), Luenne Gomez Pieters a bisa NoticiaCla. Enberdad e intencion tabata pa keda cla pa introduci esaki for di 2018 caba, pero logisticamente no a keda cla. E intencion ta pa ora cu presenta e plachinan ‘nobo’, e lo tin un cantidad di caracteristica adicional riba dje. E intencion ta pa, pa medio di e plachi, duna mas servicio y ‘conecta’ mas departamento cu otro.

CARACTERISTICA

Segun Gomez, a haya un presentacion di un compania di Alemania riba e tema, y a check tambe cu paisnan manera Merca y Hulanda riba e operacion di tipo di plachinan asina pa ta miho informa. Entre e caracteristica, e por bin cu e.o. barcodes cu por tin informacion valioso pa polis uza pa nan trabou. Tambe tin watermark, y e tipo di ink reflectivo cu ta facil detectal y visibel riba caminda. E intencion ta cu ta busca e plachi solamente un biaha, y esey ta keda e plachi pa ‘semper’. Berdad cu un plachi asina por zona mas caro y cu e lo por costa e consumidor mas placa cu awor, esta mas cu 20 florin cu ta e gasto actual. Pero e intencion ta, segun Gomez, pa haci’e budget neutral, cu ta nifica cu e no ta sali extra pa e cliente. Mes momento Gomez a clarifica e critica cu e plachi ta costa 300 florin etc, siendo cu esey no ta berdad. “E plachi ta costa 20 florin, e sticker ta costa 6 florin. E gasto di 300 y pico, ta e belasting cu e persona ta paga pa e auto” Gomez a bisa. Pues no ta e plachi ta costa 300 florin, sino 20 florin.

KEDA CLA PA 2019

E intencion ta pa cuminsa cu e proceso pa e plachi nobo, inicio di otro aña y pa fin di otro aña si, introduci esun nobo. Mientrastanto, manera cu a informa caba e aña 2018 ta keda ainda cu e plachi blauw. Lo duna e posibilidad atrobe pa na december caba paga e impuesto y ricibi e stickernan corespondiente, cu tin diferente color pa 2018. Ta purbando pa keda cla caba for di november e biaha aki. Ademas a splica cu por pone e stickernan caba riba e auto prome cu aña bolter, y cu esey no mester ta un problema.