Gomez: Reemplasa plachi di number blikia pa uno nobo, gratis

ORANJESTAD – E cantidad di numbernan di auto (plachi) cu ta blikiando ta birando mas grandi. Director di impuesto (DIMP) Luenne Gomez a confirma (un biaha mas) pa NoticiaCla cu enberdad tin un batch (grupo) di plachi imprimi, cu ta inferior cu ta resulta cu e plachi ta bira casi no reconosible. Pa e grupo di automobilista aki, (primordialmente e grupo cu den ultimo aña a haya nan number) nan por reclama esaki na DIMP, pa cual nan por haya un plachi completamente gratis. Pa esaki tin un proceso cu tin cu sigui si. Manera cu e portal aki a informa mas tempran, e plachi blauw ta keda vigente tambe pa 2018.

PROCESO

Segun Gomez, manera a informa anteriormente, si un automobilista tin un plachi cu ta blikia, e por acudi libremente na DIMP (departamento di impuesto) na e edificio D (esun unda cu tabata entrega plachi nobo) pa informa y reclama su plachi nobo. E tin cu kita su plachinan di number di e auto un rato, mustra esaki na e personal di e loket (den edificio D), unda cu ta tuma nota di e situacion, pa e personal por order plachinan nobo pa e cliente. Ora cu e plachinan ta cla (totalmente gratis pa e automobilista), ta notifica e persona y e persona por busca esaki na e mesun loket.