Bermudez: No tin presupuesto traha te pa tin buraco financiero

ORANJESTAD – No tin un presupuesto 2018, te pa tin un buraco den dje (di p.e 200 miyon florin). Asina minister di finanza Angel Bermudez a bisa NoticiaCla LIVE e siman aki. A tuma nota di e declaracionnan politico haci, pero e cifranan cu ta wordo menciona ta deriva di un documento cu tin e ‘knelpunten’ pa tene cuenta cu ne pa 2018. No cu ta un buraco cu tin pa yena aworaki. Bermudez ta consciente di e informacionnan cu ta circula durante campaña y cu ta tira cifra y ta crea un ambiente cu no ta cuadra cu realidad.

COMPRONDE

E hecho cu tin un documento riba caya cu ta papia di cierto ‘knelpunten’ pa 2018, facilmente por wordo interpreta y compronde pa esnan cu tin conocemento di cifra y sa con pa anda cu nan. E mandatario demisionario ta keda asombra si di e forma con e informacion ta wordo treci dilanti creando e ambiente aworaki cu como si fuera tin un buraco di 200 miyon florin. A confirma cu no tin un presupuesto traha, te pa haya e ‘buraco’ manera cu ta wordo menciona. Ta riba peticion di e presidente di CAFt awor, cu ta bay traha un presentacion pa tin algo riba papel den un forma di aclaracion.

PRESUPUESTO

E mandatario a bolbe aclaria cu no por concipia un presupuesto pa 2018 si no sa e maneho di e gobierno siguiente. E maneho bo ta traduci den e presupuesto. Por lo menos uno realistico. Loke a sosode ta cu lo bay traha algo di loke tin caba, cu ta consistente manera payroll, gasto di ekipo, edificio, sin maneho (beleidsarm). “E apelacion di dje a pone cu a sinta mainta trempan cu e directie financien y a palabra con ta bay colecta e cifranan di e aña aki pa loke ta valido pa otro aña y lo traha un presupuesto den liña grandi”.

HULANDA

E comparacion cu Hulanda tampoco no ta cuadra segun Bermudez. A compara Aruba cu Hulanda, den e sentido cu na Hulanda tambe tin un cambio di gobierno, siendo cu ey si lo mester tabatin un presupuesto traha. Pues si eynan nan por, pakico no por haci e aki tambe. Riba esey Bermudez a splica cu ey tambe cos no ta mucho otro cu na Aruba. “Esnan cu ta sigui noticia di Hulanda, eynan tambe nan a haya nan ta traha un beleidsarme begroting pa 2018 pasobra e formacion no a bin cla. Ey nan tambe consecuencia di esey ta cu e derde dinsdag (prinsjesdag) no tabatin algemene beschouwing. Normalmente tin e entrega di begroting e diamars ey, y ta sigui cu un debate politico encuanto e maneho di e aña siguiente. Esey no a tuma lugar e biaha aki”. Bermudez a finalisa bisando.