Wever: Hulanda mester yuda cu situacion financiero di Aruba

ORANJESTAD – E chens ta grandi cu gobierno nobo di Aruba lo bati na porta di Hulanda pa ayudo financiero, y un investigacion riba corupcion den gobierno (anterior). Asina partner di NoticiaCla.com, Caribisch Netwerk ta raporta. E intencion ta tambe pa purba renegocia e asina yama ‘acuerdo di diahuebs santo’. Asina e posibel proximo prome minister di Aruba Evelyn Wever (MEP) a bisa den un combersacion cu CN.

BURACO FINANCIERO

Wever ta papia e.o. riba e ‘buraco financiero’ cu nan a haya sa di dje durante combersacion cu informador y gobernador. Manera ta conoci, informador Swaen a entrega su relato na Gobernador Boekhoudt cu awor tin cu apunta un formado. Esey normalmente ta bira e proximo prome minister, pues den e caso aki Evelyn Wever Croes.

NUBIA SCUR

Segun Wever, tin un nubia scur riba imagen di Aruba den Reino. “Esey nos tin cu remedia. Y unabes cu a remedia esey, por papia riba e futuro. Awor nos ta den un posicion desventahoso. Debe ta mucho halto, nos tin un curatela financiero, nos ta haci poco na combati corupcion, nos tin un KB na caminda of ta merece uno, basa riba ‘integridad'. Nos no ta den un bon posicion pa determina algo di Aruba su structura estatal den Reino”, Wever a bisa.

Cu e kier kibra cu e maneho di e gobierno actual di Mike Eman, ta hopi cla. Manera por corda, Eman a bay den un welga di hamber na 2014, pa protesta metemendo di Hulanda den su asuntonan financiero. Wever ta haya cu Aruba mes mester atende cu su asuntonan. “Nos no mester bati na porta di Hulanda pa tur dos”. Mes momento sinembargo, e ta papia di e situacion financiero penoso di Aruba, pa cual si nos isla mester haya asistencia di Hulanda.

FIANSA

Un solucion lihe ta den un forma di un prestamo ‘suave’, osea un refinanciamento di e debenan contra un interes abou. Pa esey, Hulanda tin cu para garantia. Cu bista riba esey, kier renegocia e tratado di diahuebs santo, cu ainda Hulanda no kier ehecuta, pasobra Aruba no a cumpli cu e exigencianan pa cu tal.

Pa Caribisch Netwerk/ Sharina Henriquez