Kiwanis Club of Aruba a tene su wine gala ‘The Great Gatsby’

ORANJESTAD- Kiwanis Club of Aruba a tene su fiesta anual di gala pa recauda fondo cu ta sobresali semper p’e ambiente unico y elegancia cu ta combina cu e tema di e anochi. E aña aki Renaissance Convention Center a keda comberti den “Mansion di Gatsby” den e colornan principal blanco, preto y oro acentuando e decoracion consistiendo di entre otro perla, pluma y efectonan di luz unico.

E companianan di biña a presenta nan booth decora cu originalidad y aki por a conta cu presencia di: Arion Wine Company, Hodgson Trading, Playa Liquor & Bottling Company, Pepia EST, Romar Trading y Tropical Bottling Company.

Manera tur e fiestanan di Kiwanis Club of Aruba unda e bon musica ta un di e highlights, e biaha aki e combinacion musical poderoso tabata den man di e legendario Robert Jeand’or & Su Solo Banda Show, ‘N Fuzion y Buleria. DJ Edson Tromp a pone esnan di tur edad goza den style di disco cu efectonan di luz di ELITE Productions. Pa di dos aña Jean Carlo Espinal a fungi como MC, cu su forma unico di trece animacion a pone un ambiente sin igual.

Den e estilo cu Kiwanis Club of Aruba a presenta ‘The Great Gatsby’ a duna esunnan cu a asisti riba e diasabra anochi na e fiesta, e oportunidad pa luci elegancia y estilo cu un toke special den nan vestuario. Riba e facebook page di Kiwanis Club of Aruba tin tur e potretnan saca pa e fotografo Dwight Jimenez.

E premio pa ‘Best Dressed Female’ a keda entrega na Jessica Maduro. “Best Dressed Male” a bay pa Ryon Dijkhoff y “Best Dressed Couple” a resulta den Noritza Perez y Rothmar Coenraad. E “door prize” a ser gana pa Rodney van der Biezen cu a ricibi un viahe pa 2 persona pa New York City.