Lo keda uza number di auto blauw di 2015 den 2018 tambe

ORANJESTAD – Pa di tres aña consecutivo, departamento di impuesto ta bay mantene e mesun plachi di number blauw (di 2015) y ta cambia solamente e sticker. Asina director di departamento di impuesto Luenne Gomez a confirma pa NoticiaCla. Pa vehiculo di dos wiel, si tin un desviacion y ta entrega plachi nobo, cu ta color blanco cu letter oranje. Pa loke ta e sticker, e biaha aki e color pa pago pa prome y di dos cuartal ta color shinishi, mientras pa pago pa e di 3 y 4 cuartal ta bira e color fuchsia.

PLACHI NOBO

Segun Gomez, e intencion ta si pa prepara tur cos den 2018 pa por bin cu un plachi generico pa 2019, cu lo contene varios caracteristica unico. Lo cuminsa cu e proceso di destaho y preparacion total asina cu aña habri, pa por keda cla pa fin di 2019 por efectua e cambio. E intencion, manera minister demisionario di finansa Angel Bermudez a bisa anteriormente, tabata pa introduci e cambio pa 2018, pero logisticamente esaki no a logra.