Impacto economico turismo crusero 2017: minimo di $ 85.5 miyon

ORANJESTAD – Impacto economico di turismo crusero pa loke ta 2017 minimo di $ 85.5 miyon segun informacion difundi durante e simposio di turismo crusero diahuebs. E siman aki Aruba a conoce su di tres edicion di e ‘Cruise Symposium Aruba’, organisa pa Aruba Tourism Authority.

CONTINUACION

Segun informacion suministra, mundialmente nos por mira un continuacion cu biahe y turismo ta destaca den e sector economico, contribuyendo cu 10% na e GDP global y apoyando na 1 di cada 10 trabounan riba nos mundo. “Manera nos tur sa, biahe y turismo ta representa 88% di Aruba su GDP, cu ta significante mas halto compara cu e average mundial. 89% di nos empleo total ta directo of indirecto relata cu biahe y turismo”.

TJIN-ASJOE

Durante e programa di Cruise Symposium, Ronella Tjin Asjoe-Croes – CEO di Aruba Tourism Authority a duna di conoce cu A.T.A. ta continua di monitorea e industria crusero. Aspectonan manera combustibel cu ta subiendo den prijs, enfoke pa cu bienestar y sostenibilidad pa cu cruseronan den futuro, ta wordo teni na cuenta.

Aruba su direccion strategico y su prioridadnan pa 2018 no a cambia significante, pero e accion y e obhetivonan a wordo ahusta segun e desaroyo y e tendencianan trec’i dilanti. Tjin Asjoe-Croes a comparti cu un di e obhetivonan pa 2018 ta pa turismo crucero crece cu 7% compara cu 2017. Tambe a ilustra cu e impacto economico pa medio di gasto di bishitantenan crucero a subi di $72 miyon pa $85.5 miyon, cu ta locual ta proyecta pa e aña aki. Adicionalmente ta proyecta cu turismo crucero lo crece cu 16% den pasahero e aña aki compara cu aña pasa, y pa 2018 esaki lo surpasa 7% di crecemento, cu ta basa riba bishitanan durante temporada abou.

Como parti di encuesta conduci pa varios linea crucero, Aruba ta sigui destaca como un di e destinacionnan faborito den e region di Caribe riba nan iterinario. “No obstante e resultadonan aki, hasta e miho resultado den mundo ta keda insignificante si e no wordo mantene. Esey kiermen cu nos destinacion mester sigui intenta pa semper mehora y mantene nos producto na un nivel halto”, Tjin Asjoe-Croes a laga sa.

ARENDS

Segun Mario Arends, Cruise Manager na Aruba Tourism Authority, desde 2016, A.T.A. mes ta conduci encuesta bou nos bishitantenan crusero, cual ta enfoca entre otro riba e satisfaccion di e turista crusero, cuanto e ta gasta na Aruba durante cu e ta bishita nos isla, si nan ta bolbe Aruba y si nan lo recomenda nos destinacion.

38% di e turistanan crusero ta mira nos destinacion como uno di beach y 28% ta mira nos como e isla mas cariñoso. Ademas 10% ta wak nos como e luga mas felis. Durante su presentacion, Arends a elabora riba e perfil di nos bishitantenan crusero, entre otro nan edad, ganashi anual y naturalmente cuanto nan lo gasta riba nos isla durante nan bishita. E average cu un turista crusero ta gasta actualmente na nos isla ta un promedio di US$ 112.36 pa dia pa cada persona.

DE RIDDER 

Lex de Ridder, Chief Commercial Officer di Aruba Ports Authority a comparti e ‘Master Plan’ di nos waf en general, unda for di diferente angulo por a mira con nos waf ta embeyece/expande y ta aumenta na e experiencia di nos bishitantenan. Awendia, liñanan di crusero cada biaha ta bin cu barconan mas luhoso y mas grandi. A percura pa e cambionan necesario pa embeyece y asina nos waf lo keda primordialmente pa uso exclusivo di e cruseronan.

ILLES 

“Nos tur tin un storia unico pa comparti” segun Rosabelle Illes durante su presentacion, na unda el a elabora riba e manera con nos ta mira y papia di nos destinacion cu nos bishitantenan. Ela pone enfoke riba nos ‘One happy island’ y kico ta haci nos un destinacion contento, poniendo enfasis riba diferente aspectonan cu por wordo combersa cu nos turistanan.

CASCAIS

E orado principal Amilcar ‘Mico’ Cascais a comparti actualisacionnan pa cu e industria crusero mundialmente pero tambe loke Aruba mester pone mas enfoke riba dje, entre otro nos DNA y con pa trece y comparti esaki no solamente cu e turistanan crusero pero tambe cu e (futuro) lineanan crusero cu Aruba riba nan itinerario.

Cruise Symposium Aruba 2017 ta un iniciativa local cu a resulta exitoso cu participacion di esnan cu ta traha sea directo of indirectamente cu e industria di turismo di crucero. Asina hunto entre otro ta yega na un miho sinergia, miho coordinacion y miho analisis pa eleva e experiencia di e turista crucero cu al final lo mester traduci su mes den aumento pa loke ta trata di loke nan ta laga atras den nos economia.