Por lo pronto no tin visa pa Venezolano drenta islanan ABC

DEN HAAG – Por lo pronto no ta bin un visa pa Venezolanonan cu kier drenta Aruba, Corsou y Bonaire. Ni si e crisis na Venezuela empeora. Asina minister demisionario di asuntonan exterior Bert Koenders a bisa. Gobiernonan di Aruba, Corsou y Hulanda ta preocupa pa e aumento den cantidad di Venezolano cu ta bira ilegal riba e islanan. Pero nan (Hulanda) no kier introduci un visa, pasobra segun Koenders, esey lo tin un efecto pio pa e islanan segun e mandatario.

CIFRAS

Dos miembro di Tweede Kamer a pidi diahuebs pa informacion, manera cifranan di migracion y e posibel scenario si e situacion empeora. Pero e informacion ey no a wordo suministra grandemente segun e ministernan responsabel Plasterk y Koenders. Plasterk a bisa diahuebs cu e no tin cifranan nobo di migracion, ni kier comparti esaki cu Tweede Kamer, riba peticion di Aruba y Corsou. Segun e islanan, Hulanda por stimula e migracion di Venezuela cu e informacion ey.

ASILO

Segun e gobierno demisionario na Hulanda, ta apenas un fraccion di Venezolanonan ilegal ta yega e islanan via boto. Pa Venezuela no tin necesidad di visa pa drenta e islanan. Mayoria ta yega como turista, pa un duracion largo, pa despues disparce como un ilegal. Te cu awor, di e tres islanan, ta un Venezolano so a pidi asilo na Bonaire. E peticion ey a wordo trata y rechasa segun Plasterk. Esun cu a haci e peticion, a wordo manda bek despues cu e no a apela e decision.

DEBATE

Ta di cinco biaha den dos aña di tempo cu Tweede Kamer ta debati riba e tema di crisis politico y humanitario di Venezuela. Pa tanto Hulanda como e islanan ABC, ta importante pa mantene e relacionnan cu Venezuela. Turismo di Venezuela y e refinerianan na Aruba y Corsou ta contribui na e economia di e respectivo islanan.

Di Caribisch Netwerk/John Samson, partner di NoticiaCla.com